لاہور : پاکستان تحریک انصاف کے رہنما فواد چوہدری نے کہا ہے کہ نوازشریف کی تاریخ ڈیل سے بھری پڑی ہے، وہ گلی گلی گھوم کر ڈیل لینا چاہ رہے ہیں، ایسی کوئی ڈیل قبول نہیں کریں گے، ہیل مٹیل اور ایف زیڈ ای کے ذریعے نوازشریف کو پیسے بھیجے جاتے تھے۔
ان خیالات کا اظہار انہوں نے لاہور میں میڈیا سے گفتگو کرتے ہوئے کیا، فواد چوہدری نے کہا کہ ایف زیڈ ای میں ہوشربا انکشافات ہوئے ہیں، ایف زیڈ ای کی رجسٹریشن دبئی کے فری زون میں کرائی گئی،یہ کوئی کاروبارنہیں کرتی تھی۔
اس کمپنی نے 614686 پاؤنڈ کا قرض حسن نواز کی کمپنی کو دیا، ہل میٹل اورایف زیڈای کے ذریعے نوازشریف کو پیسے بھیجے جاتے تھے، سال2009میں ایک ملین پاؤنڈ نوازشریف نے حسن نواز کے اکاؤنٹ میں ڈالے، حسن نواز کے اکاؤنٹ میں ایک ہی رات میں55کروڑ روپے ٹرانسفرہوئے۔
ایف زیڈ ای بنیادی طور پر ایک منی لانڈرنگ ٹول تھی، نیب سے بچنے کا تمام ڈھونگ رچایا جارہا ہے، یاد رہے کہ اے آروائی نیوز نے گزشتہ روز ایف زیڈ ای کمپنی اور رقم کی منتقلی سے متعلق خبر گزشتہ روز دی تھی۔
ان کا مزید کہنا تھا کہ موجودہ حکومت نے نئے سال کا آغاز خوشیاں منانے والے عوام پر پیٹرول بم مار کرکیا، نواز شریف پیٹرول بم سمیت مہنگائی کا طوفان چھوڑ کرچلے گئے، علی بابا چالیس چور پاکستان پرحکمرانی کر رہے تھے، ان کرپٹ عناصرکےچیف چورنوازشریف ہیں۔
فواد چوہدری نے کہا کہ نواز شریف کا حالیہ دورہ ہل میٹل سے ہی متعلق ہے، جہانگیرترین پر اعتراض والے بتائیں کہ شہباز شریف کیلئے جہاز کیوں آیا؟ سعودی عرب میں بھی کرپشن کیخلاف کارروائیاں چل رہی ہیں۔
انہوں نے کہا کہ مشیر قومی سلامتی نے نوازشریف سے ملاقات کی، مشیر قومی سلامتی ایک غیرسیاسی عہدہ ہے، اس سے پہلے خبریں آئیں انہوں نے اجیت دوول سے ملاقات کی، مشیر کو نوازشریف سے ملاقات پر وضاحت دینی چاہیے، پاکستان کی بڑی پارٹی اور پارلیمنٹ کو اعتماد میں کیوں نہیں لیا گیا؟ سعودی عرب اور اجیت دوول سے ملاقات پر پی ٹی آئی کو تحفظات ہیں۔
رہنما پی ٹی آئی نے کہا کہ بھارتی اخبار لکھ رہا ہے کہ نوازشریف کی ڈیل ہوگئی ہے، اخبار کے مطابق نوازشریف کو مقدمات سے مبرا قرار دے دیا جائیگا، نوازشریف کی ڈیل پربھارت میں شادیانے کیوں بج رہےہیں؟
این آراو میں نوازشریف کو ڈیل ملتی ہے تو باقی لوگ اندر کیوں ہیں؟ پاکستان کے لوگوں کو ایسی ڈیل قبول نہیں ہوگی، نوازشریف کو این آراو کوئی نہیں دے سکتا، نوازشریف کے مقدمات میں جھول لگا تو پی ٹی آئی سڑکوں پر ہوگی۔
فوادچوہدری کا مزید کہنا تھا کہ شریف خاندان کی دو لڑائیاں چل رہی ہیں، ایک اداروں پرتنقید اوردوسری خاندان کی اندرونی لڑائی ہے، شہبازشریف کیلئے جہاز آیا اور نواز شریف کیلئے نہیں۔
دونوں بھائیوں کا کاروباری اشتراک ہی سیاسی اشتراک ہے، نوازشریف شہباز شریف کلیئر ہوکر آئیں ہمیں کوئی مسئلہ نہیں، ہل میٹل سعودی عرب میں63 ملین ریال کی مالیت ہے، دیکھنا ہوگا کہ نوازشریف ہل میٹل کیلئے یا این آراو کیلئےسعودی عرب گئے ہیں، نیب تحقیقات کیلئے سعودی حکومت سے بھی تعاون چاہتا ہے۔
ایک سوال کے جواب میں رہنما پی ٹی آئی نے کہا کہ ڈاکٹر طاہرالقادری کےساتھ تعاون انسانی بنیادوں پر کیاہے،
طاہر القادری سے پہلےعمران خان ماڈل ٹاؤن پہنچےتھے، ماڈل ٹاؤن تحریک کو سیاسی نہیں انسانی تحریک سمجھتے ہیں۔
