اسلام آباد : وفاقی وزیرسائنس اینڈٹیکنالوجی فوادچوہدری نے کہا وزیر اعظم عمران خان نے قیدیوں کی رہائی سے متعلق اعلیٰ اختیاراتی کمیٹی بنادی ہے، سزامکمل کرنے کے باوجود جرمانہ نہ ہونے پر قید افراد کو رہا کردیا جائے گا۔
تفصیلات کے مطابق وفاقی وزیرسائنس اینڈٹیکنالوجی فوادچوہدری نے سماجی رابطے کی ویب سائٹ ٹوئٹر پر اپنے بیان میں کہا کابینہ نےکل ایک انتہائی اہم فیصلہ کیاہے، وزیر اعظم عمران خان نےایک اعلیٰ اختیاراتی کمیٹی بنادی ہے، کمیٹی ان قیدیوں کےمقدمات کاجائزہ لےگی جوسنگین جرائم میں ملوث نہیں۔
فوادچوہدری کا کہنا تھا جوقیدی سنگین جرائم میں ملوث نہیں ان کی رہائی کا جائزہ لیا جائےگا، سزامکمل کرنےکےباوجودجرمانہ نہ ہونے پر قید افراد کو رہا کر دیا جائے گا۔
کابینہ نے ایک انتہائ اہم فیصلہ کل یہ کیا کہ ایک وزیر اعظم نے ہائ پاور کمیٹی بنائ جو جیلوں میں قید ایسے قیدیوں کے مقدمات کا جائزہ لے گی جو قتل، منشیات منی لانڈرنگ اور اسطرح کے سنگین جرائم میں ملوث نہیں ہیں، ان کی رہائ کے امکانات کا جائزہ لیا جائیگا، اور عملی اقدامات کئے جائیں گے
— Ch Fawad Hussain (@fawadchaudhry) July 31, 2019
یاد رہے گذشتہ روز معاون خصوصی برائے اطلاعات فردوس عاشق اعوان نے کابینہ اجلاس کے بعد بریفنگ دیتے ہوئے کہا تھا کابینہ نےجیل ریفارم ایجنڈاکمیٹی کے سپرد کیاہے، صوبائی حکومتوں سے ملکر جیل نظام کی تبدیل کیلئے پیشرفت کریں گے۔
فردوس عاشق اعوان کا کہنا تھا کہ قیدیوں کی حالت زا رسےمتعلق خصوصی کمیٹی تشکیل دےدی گئی ، وزیراعظم نے ہدایت کی ڈیٹاجمع کرکے حقائق سامنے لائےجائیں، مستحق اور نادار قیدیوں کو مفت قانونی معاونت فراہم کی جائے گی۔
