اسلام آباد : تحریک انصاف کے رہنما فواد چوہدری کا کہنا ہے کہ جو میں نے کہا ہے میں اس پر قائم ہوں، یہ میرا حق ہے۔
تفصیلات کے مطابق تحریک انصاف کے رہنما فواد چوہدری نے عدالت میں بیان میں کہا کہ میں نے جو باتیں کیں انکو مانتا ہوں اور کہتا ہوں کہ یہ میرا حق ہے، طاقت ور لوگوں کوسمجھناہوگا کہ عزت اپنے کنڈکٹ سےکرائی جاتی ہے، ڈنڈے سے نہیں۔
فواد چوہدری کا کہنا تھا کہ کچھ لوگ ہمیشہ سے یہی سمجھتے ہیں کہ ان پر تنقید درحقیقت غداری ہے، تاریخ اس بات کا تعین کرے گی کہ کون درست تھا اور کون غلط، میں منہ پر اچھا اچھا کہوں اور باہر جا کر گالیاں دوں، یہ کونسی عزت ہے۔
پی ٹی آئی رہنما نے جج سے مکالمے میں کہا کہ میری تضحیک کر کے یہ سمجھ رہے ہیں کہ پتہ نہیں کیا کر لیں گے، میں سابق وزیر، ممبر پارلیمنٹ رہ چکا ہوں اور سپریم کورٹ کاسینئروکیل ہوں، یہ کپڑا ڈال کر لانا اور تضحیک کرنا اس کو بھی دیکھ لیجئے گا۔
دوران سماعت ان کا کہنا تھا کہ میں یہ کہوں کہ آزادی اظہار میرا حق نہیں اس کا مطلب جمہوریت نہیں ،اگر آپ تنقید برداشت نہیں کر سکتے تو عہدے نہ لیں، میں یہ کہتا ہوں جو میں نے کہا وہ مانتا بھی ہوں یہ میرا حق ہے۔
