پاکستان تحریک انصاف کے رہنما اور سابق وفاقی وزیر اطلاعات فواد چوہدری نے کہا ہے کہ حمزہ شہباز کو فارغ کرانے کیلیے سپریم کورٹ جارہے ہیں۔
اے آر وائی نیوز کے مطابق پی ٹی آئی رہنما اور سابق وفاقی وزیر فواد چوہدری نے لاہور میں میڈیا سے گفتگو کرتے ہوئے کہا ہے کہ پنجاب کی صورتحال بہت پیچیدہ ہے، آج اسی صورتحال پر میٹنگ ہوئی اور تین آپشنز زیر غور آئے۔
فواد چوہدری نے کہا کہ سپریم کورٹ کے فیصلے کے بعد لوٹا کریسی کا خاتمہ ہوا ہے اور حمزہ شہباز کے ووٹوں میں سے 25 اراکین کے ووٹ مائنس ہوگئے جس کے بعد پی ٹی آئی کے اراکین کے پاس 173 ووٹ ہیں جبکہ حمزہ شہباز کے پاس 172 ووٹ ہیں، انہیں اب خود ہی فیصلہ کرلینا چاہیے۔
پی ٹی آئی رہنما کا کہنا تھا کہ پورا مہینہ ن لیگ بھاشن دیتی رہی کہ ہم عدالت احکامات نہیں مانتے اب سپریم کورٹ کا فیصلہ آنے کے بعد کل سے حمزہ شہباز وزیراعلیٰ کی نشست پر براجمان ہے، ان کے پاس اس وقت نمبرز گیم اپوزیشن سے کم ہیں وزیراعلیٰ کے حکم پر اب جو چیزیں ہورہی ہیں وہ قانون کے منافی ہیں۔
انہوں نے کہا کہ ہم حمزہ شہباز کو فارغ کرانے کیلیے سپریم کورٹ جارہے ہیں، کل پٹیشن دائر کر رہے ہیں کہ حمزہ شہباز غیر قانونی وزیراعلیٰ ہیں، سپریم کورٹ کے فیصلے پرمن وعن عمل کرایا جائے اور پنجاب میں نئے الیکشن کرائے جائیں۔
فواد چوہدری نے مزید کہا کہ ہم چاہتے تو اسپیکر بھی نوٹیفکیشن جاری کر دیتے لیکن ہم خود ہی عدالت سے رجوع کررہے ہیں، سپریم کورٹ کی رائے فیصلے ہی ہوتے ہیں، بھٹو کیخلاف فیصلے کو صحیح مانیں گے تو وہ بھی ٹھیک نہیں ہوگا۔
ان کا کہنا تھا کہ اس وقت پورے ملک میں کوئی حکومت نہیں ہے، ڈالر200 روپے تک پہنچ گیا ہے، صدر کسی بھی وقت شہبازشریف کو اعتماد کےووٹ کا کہہ سکتے ہیں، صرف پنجاب نہیں بلکہ پورے ملک میں الیکشن ہونے چاہیئں، الیکشن کی تاریخ کااعلان ہوجانا چاہیے اور الیکشن کی تاریخ ستمبر میں ہونی چاہئیں۔
سابق وفاقی وزیر نے کہا کہ عمران خان کو غیر قانونی طور پر نکالا گیا ہے، سیاسی بحران کے خاتمے کیلئے آزاد الیکشن کی ضرورت ہے، ہمیں کسی سے مسئلہ نہیں ہے، انتخابات کی اصلاحات پر بات کرنا چاہتے ہیں، وقت بدل گیا ہے میرٹ پر چیزیں واپس آئیں گی، مجھے نہیں معلوم کہ اسٹیبلشمنٹ دباؤڈال رہی کہ نہیں لیکن میڈیا سمیت تمام لوگوں کا دباؤ ہے۔
انہوں نے کہا کہ جن ٹانگوں پر یہ کھڑے ہیں ان کیلئے اس پر کھڑا رہنا مشکل ہے، شہباز اور حمزہ نے جو چورن بیچا جس جس نے کھایا بدہضمی ہوگئی، اس وقت کابینہ کے تمام وزرا کے آنسو نکل رہے ہیں، اس حکومت کو خود ہی مان لینا چاہیے۔
