سابق وفاقی وزیر اور پی ٹی آئی کے رہنما فواد چوہدری نے کہا ہے کہ شہباز شریف کنفیوژ ہیں ان کو مشورہ ہے کہ گھبرانا نہیں ہے۔
پی ٹی آئی رہنما فواد چوہدری نے وزیراعظم شہباز شریف کے بیان کے ردعمل میں کہا کہ شہباز شریف کنفیوژ ہیں انہیں سمجھ نہیں آرہا کہ الزام کیسے لگانا ہے، عمران خان پر کیچڑ اچھالنے سے یہ خود گندے ہورہے ہیں۔
فواد چوہدری نے مزید کہا کہ گھڑی پر شہباز شریف کو اعتراض کیا ہے، میری گھڑی ہے بیچ دی تو اعتراض کا کیا جواز؟
انہوں نے کہا کہ سننے میں آرہا ہے کہ پیٹرول کی قیمت میں ہوشربا اضافہ کررہے ہیں، شہباز شریف سے مطالبہ ہے کہ پٹرول پر سبسڈی کو برقرار رکھیں، شہباز شریف گھبرائیں نہیں کل کراچی کا جلسہ دیکھیں۔
فواد چوہدری نے مزید کہا کہ ن لیگ اس وقت الٹے پاؤں بھاگ رہی ہیں، لگتا یہ ہے کہ نوازشریف واپس نہ آئیں مگر یہ مریم نواز کو بھگا دیں گے لیکن مریم نواز کو بھگانے کی کوشش کی گئی تو ہم یہ نہیں ہونےدینگے۔
علاوہ ازیں فواد چوہدری نے ٹوئٹ کرتے ہوئے کہا ہے کہ امپورٹڈحکومت نامنظور، ملک میں نئے انتخابات ہونے ہیں یہ طے ہے۔
ملک میں نئے انتخابات ہونے ہیں یہ طے ہے، فیصلہ کرنیوالوں نے صرف ایک فیصلہ کرنا ہے یہ فیصلہ زیادہ نقصان اٹھا کر کرنا ہے یا کم نقصان پر بات بن جائے گی۔۔۔ #امپورٹڈ_حکومت_نامنظور
— Ch Fawad Hussain (@fawadchaudhry) April 15, 2022
سابق وفاقی وزیر نے مزید لکھا ہے کہ فیصلہ کرنیوالوں نےصرف ایک فیصلہ کرنا ہے کہ یہ فیصلہ زیادہ نقصان اٹھا کرکرنا ہے یا کم نقصان پربات بن جائےگی۔
