بیروت: اسرائیلی بمباری کے نتیجے میں شہید ہونے والے حزب اللہ کے کمانڈر فواد شُکر کو بیروت میں سپرد خاک کردیا گیا۔
بین الاقوامی خبر رساں ادارے کی رپورٹ کے مطابق حزب اللہ کے رہنما حسن نصر اللہ کا کہنا ہے کہ کمانڈر فواد شکر اور حماس کے سیاسی سربراہ اسماعیل ہنیہ کی شہادت کے بعد اسرائیل کے ساتھ جنگ نئے مرحلے میں داخل ہو گئی ہے۔
حسن نصر اللہ نے اعلان کیا کہ حزب اللہ بیروت کے جنوبی مضافات پر حملے میں اس گروپ کے سب سے سینئر فوجی کمانڈر کی اسرائیلی حملے میں شہادت کا بھرپور جواب دے گی۔
ان کا کہنا تھا کہ کمانڈر فواد شکر کے قتل پر مزاحمتی ردعمل طے پا گیا ہے اور اس پر کوئی بات چیت نہیں ہوئی۔ نامعلوم ممالک نے حزب اللہ سے جوابی کارروائی نہ کرنے کو کہا ہے لیکن انہوں نے کہا کہ گروپ ایک حقیقی ردعمل کی تلاش کر رہا ہے۔
اسماعیل ہنیہ کی شہادت: ایرانی آرمی چیف کا اہم بیان
انہوں نے مزید کہا کہ جو بھی خطے میں حالات کو ٹھنڈا دیکھنا چاہتا ہے اسے غزہ میں جنگ کو روکنے کے لیے کام کرنا چاہیے، کیونکہ خطہ جنگ کے ایک نئے مرحلے میں داخل ہو چکا ہے۔
