تحریک انصاف کے سابق رہنما فواد چوہدری کی اہلیہ حبا فواد نے کہا ہے نواز شریف کی حمایت نہیں کرتی، وہ وزیراعظم رہے ہیں ان کی عزت کرتی ہوں۔
اے آر وائی نیوز کے پروگرام آف دی ریکارڈ میں گفتگو کرتے ہوئے حبا فواد چوہدری نے کہا کہ میں نے ٹوئٹ کیا تھا کہ تمام پارٹیوں کی حمایت کرتی ہوں۔ نواز شریف کی حمایت نہیں کرتی، وہ وزیراعظم رہے ہیں ان کی عزت کرتی ہوں۔ پیپلز پارٹی بھی ہمارے لیے قابل قبول نہیں ہے۔
انھوں نے کہا کہ آج جو میرے ساتھ ہوا سمجھ نہیں آرہا ایسا کیوں ہوا۔ میرے خلاف بہت زیادہ سیاست ہورہی ہے۔ میرے ساتھ فوادچوہدری کی موجودگی میں کبھی ایسا سلوک نہیں ہوا تھا۔
حبا فواد کا معروف اینکر کاشف عباسی کے پروگرام میں گفتگو کرتے ہوئے کہنا تھا کہ خاندان کے کافی افراد میرے خلاف ہوگئے ہیں۔ کچھ دنوں میں فوادچوہدری سے ملاقات ہوگی۔ فواد چوہدری نے کوررنگ امیدوار بننے کا کہا تو بنوں گی۔
انھوں نے کہا کہ میرے خاندان میں ٹکٹ کی لڑائی ہے یا کچھ اور سمجھ نہیں آرہا۔ یہ حلقہ فواد چوہدری کا ہے یہ خاندانی نشست نہیں ہے۔ چوہدری شہباز ہمارے بڑے ہیں الیکشن لڑنا چاہتے ہیں تو وہ ضرور لڑیں۔
فواد چوہدری کی اہلیہ نے کہا کہ چوہدری شہباز الیکشن ضرورلڑیں لیکن کسی کو ذاتیات پر اترنا نہیں چاہیے۔ میں سیاسی نہیں ہوں اور نہ کوئی سیاسی پارٹی جوائن کی ہے۔
حبا فواد کا کہنا تھا کہ خاندان میں اختلافات سے متعلق فواد چوہدری جانتے ہیں۔ فیصل چوہدری میرے شوہر کا کیس لڑرہے ہیں تو ہمیں تفصیل بتانی چاہیے۔
انھوں نے کہا کہ مجھے ڈس آن نہیں کیا جاسکتا، فواد اور میری 2 بیٹیاں ہیں۔ فواد چوہدری سے بیٹیوں کی ملاقات نہیں کروائی گئی۔ فواد بیٹیوں سے ملاقات کے لیے ابھی بھی روتے ہیں۔
حباچوہدری نے کہا کہ میں نے جہلم میں فواد چوہدری کے لیے مہم چلائی تو اس میں حرج کیا ہے۔ میں نے پریس کانفرنس کرنی تھی جہلم میں پریس کلب پر تالے لگا دیے گئے۔
