اسلام آباد: وفاقی وزیر برائے سائنس اینڈ ٹیکنالوجی فواد چوہدری نے کہا ہے کہ تھائی ایئر نے لاہور سے بھی آپریشن شروع کرنے کا فیصلہ کیا ہے۔
تفصیلات کے مطابق وفاقی وزیر برائے سائنس اینڈ ٹیکنالوجی فواد چوہدری نے سماجی رابطے کی ویب سائٹ ٹویٹر پر لکھا ہے کہ تھائی ایئر نے لاہور سے بھی آپریشن شروع کرنے کا فیصلہ کیا ہے، تھائی ایئر ہفتے میں چار پروازیں چلائے گی۔
وفاقی وزیر فواد چوہدری کے مطابق 16 جولائی سے تھائی ایئر کی لاہور سے بنکاک پروازیں شروع ہوں گی۔
Thai airways to start operation from Lahore to bangkok and beyond with 4 flights a week starting 16 July 2019 #NayaPakistan
— Ch Fawad Hussain (@fawadchaudhry) July 2, 2019
واضح رہے کہ 3 جون 2019 کو برٹش ایئر ویز کی دس سال بعد پہلی پرواز پاکستان پہنچی تھی، وفاقی وزیر ہوا بازی سمیت دیگر حکومتی شخصیات نے مسافروں کا استقبال کیا تھا۔
مزید پڑھیں: برٹش ایئرویزکی پہلی پرواز اسلام آباد ایئرپورٹ پرلینڈ کرگئی
برطانوی فضائی کمپنی کی پرواز اسلام آباد ایئرپورٹ پر 240 مسافروں کو لے کر پاکستان پہنچی تھی، برٹش ایئرویز کی لندن سے اسلام آباد ہفتہ وار 3 پروازیں چلائی جارہی ہیں۔
وفاقی وزیرایوی ایشن غلام سرور خان نے برٹش ایئزویز کے پاکستان میں فضائی آپریشن کی بحالی پر ویڈیو پیغام میں کہا تھا کہ برٹش ایئرویز کے پاکستان میں آپریشن کے بحالی پرخوشی ہے۔
یاد رہے کہ 10 سال قبل 2008 میں اسلام آباد میں میریٹ ہوٹل پر بم دھماکے کے بعد برٹش ایئرویز نے پاکستان کے لیے فضائی آپریشن بند کردیا تھا۔
