لاہور: صوبائی وزیر اطلاعات فیاض الحسن چوہان کا کہنا ہے کہ عوام کو اگلے 20 سے 25 دن محتاط رہنا چاہیئے، آنے والے دنوں میں مزید احتیاط کی ضرورت ہے۔
تفصیلات کے مطابق صوبہ پنجاب کے وزیر اطلاعات فیاض الحسن چوہان کا کہنا ہے کہ حکومت نے صحافیوں اور میڈیا ورکرز کے تحفظ کے لیے بھی اقدامات کیے ہیں، تمام اضلاع میں اخبار فروش یونینز کو حفاظتی کٹس فراہم کریں گے۔
فیاض چوہان کا کہنا تھا کہ اخبار فروش آرگنائزیشنز ڈسٹرکٹ انفارمیشن افسر سے رابطہ کریں۔
انہوں نے کہا کہ وزیر اعلیٰ عثمان بزدار اور ان کی حکومت کرونا وائرس کے خلاف فرنٹ پر کام کر رہی ہے، عوام کو اگلے 20 سے 25 دن کو ہلکا نہیں لینا چاہیئے۔ آنے والے دنوں میں مزید احتیاط کی ضرورت ہے۔
فیاض چوہان کا مزید کہنا تھا کہ قوم نے دہشت گردی کے خلاف جنگ جیتی، اب کرونا کے خلاف جنگ بھی جیتیں گے۔
اس سے قبل فیاض الحسن چوہان نے صحافیوں اور میڈیا ہاؤسز کے لیے ریلیف پیکج کا اعلان کرتے ہوئے بتایا تھا کہ کرونا وائرس سے جاں بحق ہونے والے صحافی کے لواحقین کو 10 لاکھ جبکہ صحافی کی بیوہ کو تاحیات 10 ہزار ماہانہ پنشن دی جائے گی۔
انہوں نے کہا تھا کہ کرونا وائرس سے متاثر صحافی کو 1 لاکھ روپے ریلیف فنڈ سے دیے جائیں گے۔
