صدارتی امیدوار مولانا فضل الرحمان کی متحدہ رہنماؤں سے ملاقات، تعاون کی درخواست -
The news is by your side.

Advertisement

صدارتی امیدوار مولانا فضل الرحمان کی متحدہ رہنماؤں سے ملاقات، تعاون کی درخواست

کراچی : صدارتی مشن پر کراچی میں موجود صدارتی امیدوار مولانا فضل الرحمان ایم کیو ایم کے مرکز بہادرآباد جا پہنچے، انہوں نے متحدہ رہنماؤں سے الیکشن میں تعاون کی درخواست کی۔

تفصیلات کے مطابق جمیعت علمائے اسلام ف کے سربراہ مولانا فضل الرحمان وفد کے ساتھ ایم کیو ایم مرکز بہادرآباد پہنچے، انہوں نے متحدہ رہنماؤں سے ملاقات میں صدارتی الیکشن کیلئے تعاون کی درخواست کی۔

اس موقع پر عامرخان، فیصل سبزواری، کنورنوید جمیل، میئر کراچی وسیم اختر اور دیگر موجود تھے، ملاقات میں سیاسی صورتحال سمیت صدر کےانتخاب سے متعلق گفتگو کی گئی، مولانا فضل الرحمان نے صدارتی الیکشن میں ووٹ کیلئے ایم کیوایم رہنماؤں سے تعاون کی درخواست کی۔

ان کا کہنا تھا کہ ملکی سیاست میں توازن برقرار رکھنے کیلئے متحدہ اپوزیشن نے مجھ پر اعتماد کیا ہے، صدارتی انتخاب میں ایم کیوایم اپوزیشن کے امیدوارکو ووٹ دے، ماضی میں بھی آپ ہمارا ساتھ دیتے آئے ہیں، امید ہے ایم کیوایم میرے حق میں فیصلہ کرے گی۔

اس موقع پر عامرخان نے کہا کہ ہم چاہتے ہیں کراچی کے مسائل حل ہوں، عوام کو ریلیف ملے، حمایت کرنے یا نہ کرنے کا فیصلہ رابطہ کمیٹی اجلاس میں کریں گے، مولانا صاحب سے ہمارے بہت اچھے تعلقات رہے ہیں، مستقبل میں بھی تعلقات رکھیں گے۔

عامر خان نے بتایا کہ مولانا صاحب کی بات رابطہ کمیٹی میں رکھیں گے جو فیصلہ ہوگا آگاہ کردینگے، ہم موجودہ حکومت کا حصہ ہیں، اس کے علاوہ ہماری صدارتی امیدوار عارف علوی سے بھی بات ہوئی تھی۔

ملاقات کے بعد میڈیا سے گفتگو کرتے ہوئے مولانا فضل الرحمان نے کہا کہ ایم کیوایم رہنماؤں سے ملاقات کی ہے، انہوں نے سنجیدگی سے ہماری درخواست سنی۔

ایم کیوایم ہمیشہ پارلیمانی سیاست کا حصہ رہی ہے، وہ ملکی استحکام کیلئے کام کا بڑا تجربہ بھی رکھتی ہے، امید ہے ایم کیوایم ہماری تجویز پر سنجیدگی سے غور بھی کرے گی، اور ایم کیوایم ایسا فیصلہ کرے گی جس کے مثبت اثرات نکلیں گے۔

Comments

comments

یہ بھی پڑھیں