جے یو آئی سربراہ مولانا فضل الرحمان نے کہا ہے کہ پاکستان تحریک انصاف سے اتحاد ہوتا ہے یا نہیں جب آمنے سامنے بیٹھیں گے تب پتہ چلے گا۔
اے آر وائی نیوز کے مطابق جمعیت علمائے اسلام کے سربراہ مولانا فضل الرحمان نے بکھر میں میڈیا سے گفتگو کرتے ہوئے کہا ہے کہ ہمارا الگ بیانیہ ہے اس کو پی ٹی آئی سے نہ جوڑا جائے۔ تحریک انصاف سے اتحاد ہوتا ہے یا نہیں، یہ تب ہی پتہ چلے گا جب ہم آمنے سامنے بیٹھیں گے۔
فضل الرحمان نے کہا کہ میرا اپنا بیانیہ ہے کہ میری ایک بڑی پارٹی ہے جس کو دھاندلی کے ذریعے ہرایا گیا۔ جس کا الیکشن میں کردار تھا اس نے ادا نہ کیا جس کا نہیں تھا اُس نے ادا کیا۔
ان کا کہنا تھا کہ ملک کو بہتر انداز سے چلانا ہے تو حکومتوں اور بیوروکریسی کو آزاد کرنا ہوگا۔ حکومت سیاسی لوگوں کی بننی چاہیے۔ کے پی میں مولانا دشمنی میں 2 عہدے میرے مخالفوں کو دیے گئے۔ ہمارے پاس آئین ہے اور ہم چاہتے ہیں کہ قانون پر عمل ہو۔
جے یو آئی سربراہ نے کہا کہ الیکٹیبلز سے پیسے لیے جاتے ہیں اور باریاں دی جاتی ہیں۔ ہم دماغ کو جمود کا شکار نہیں ہونے دیں گے کہ جو مسلط کیا جائے، اسے قبول کر لیں۔
مولانا فضل الرحمان کا یہ بھی کہنا تھا کہ بڑے صوبے کا کردار اس وقت سیاسی لحاظ سے کچھ بھی نہیں۔ آپ ان کو ووٹ دیتے ہیں تو یہ آپ سے وہی سلوک کرتے ہیں جیسا آج کسانوں کے ساتھ کر رہے ہیں۔
