لاہور: مذہبی جماعتوں کے سیاسی اتحاد سے بننے والی نئی جماعت متحدہ مجلس عمل کا اجلاس کل ہوگا جس میں فضل الرحمان کو صدر بنائے جانے کا امکان ہے۔
ذرائع کے مطابق متحدہ مجلس عمل میں شامل مذہبی جماعتوں نے آئندہ اتنخابات سے قبل بھرپور سیاسی قوت کے ساتھ واپس آنے کا فیصلہ کرلیا ہے، اس ضمن میں کل لاہور میں اہم اجلاس طلب کیا جائے گا۔
ذرائع کا کہنا ہے کہ کل ہونے والے اجلاس میں جمعیت علمائے اسلام ف کے سربراہ مولانا فضل الرحمان کو صدر جبکہ جماعت اسلامی کے امیر سراج الحق، ساجد علی نقویٰ، جمعیت اہلحدیث کے چیئرمین ساجد میر اور پیر اعجاز ہاشمی کو نائب صدور منتخب کیے جانے کا امکان ہے۔
مزید پڑھیں: متحدہ مجلس عمل کو مکمل طور پر بحال کرنے کا اعلان
یہ بھی پڑھیں: متحدہ مجلس عمل کی بحالی، اتحاد میں نئی جماعتوں کی شمولیت کا امکان
علاوہ ازیں دیگر ذمہ داریوں پر جماعت اسلامی کے رہنما لیاقت بلوچ کو سیکریٹری جنرل، اویس احمد نورانی کو سیکریٹری اطلاعات نامزد کیا جائے گا اور 4 نائب صدور سمیت 4 ڈپٹی سیکریٹری جنرل بھی مقرر کیے جائیں گے۔
ذرائع کا یہ بھی کہنا تھا کہ ایم ایم اے کے اجلاس میں نئے دستور کی منظوری دی جائے گی جبکہ عالمی اور ملکی موجودہ صورتحال کو مدنظر رکھتے ہوئے آئندہ کی حکمتِ عملی مرتب کی جائے گی۔
واضح رہے کہ متحدہ مجلس عمل کی بحالی کے لیے جماعت اسلامی، جمعیت علمائے اسلام ف اور دیگر مذہبی جماعتیں گزشتہ برس سے کافی متحرک تھیں، رواں سال جنوری میں مولانا فضل الرحمان نے ایم ایم کی بحالی کا اعلان کرتے ہوئے 20 رکنی مرکزی کونسل تشکیل دی تھی۔
اسے بھی پڑھیں: ایم ایم اے بحال، مولانا فضل الرحمان صدر منتخب، 20 رکنی مرکزی کونسل کا اعلان
مولانا فضل الرحمان کا کہنا تھا کہ ایم ایم اے باقاعدہ طور پر بحال ہو گئی اور متحدہ مجلس عمل کے دستور کے تحت 20 رکنی مرکزی کونسل پر مشاورت مکمل کرلی گئی۔ اُن کا کہنا تھا کہ ایم ایم اے کے نام سے ایک جماعت الیکشن کمیشن میں رجسٹرڈ تھی تاہم نئی رجسٹریشن کے لیے اب دوبارہ درخواست دی جائے گی۔