اسلام آباد: جمعیت علمائے اسلام ف کے سربراہ مولانا فضل الرحمان نے کہا ہے کہ 27 اکتوبر کو کراچی میں بڑا اجتماع ہوگا، وہ خود اجتماع میں شرکت کریں گے۔
تفصیلات کے مطابق جے یو آئی ف نے حکومت مخالف آزادی مارچ کا آغاز سندھ کے بڑے شہر کراچی سے کرنے کا فیصلہ کیا ہے، اس احتجاجی اجتماع میں فضل الرحمان خود شریک ہوں گے۔
مولانا نے میڈیا سے گفتگو کرتے ہوئے کہا کہ 31 اکتوبر کو آزادی مارچ اسلام آباد میں داخل ہوگا، ہمارا مؤقف واضح ہے جس پر تمام سیاسی جماعتیں متفق ہیں، موجودہ حکمرانوں کو حق حکمرانی حاصل نہیں، کرپشن کے الزام لگا کر لوگوں کو جیلوں میں رکھا جا رہا ہے، آزادی مارچ سے عام آدمی نے امیدیں وابستہ کر لی ہیں، تمام طبقات شامل ہونا چاہتے ہیں۔
تازہ ترین: رہبر کمیٹی سے کل ملاقات ہے، وزیر اعظم کے استعفے پر بات نہیں کریں گے: پرویز خٹک
انھوں نے کہا کہ تمام جماعتوں پر مشتمل رہبر کمیٹی نے مذاکرات سے انکار نہیں کیا ہے، کل رہبر کمیٹی حکومتی مذاکراتی ٹیم سے مل رہی ہے، جو بھی وہ کہیں گے باہمی مشاورت سے جواب مرتب کیا جائے گا۔ 27 اکتوبر کو ملک بھر میں کشمیریوں سے اظہار یک جہتی میں شریک ہوں گے، تاریخ میں رد و بدل کا کوئی امکان نہیں۔
ان کا کہنا تھا کہ ایک طرف کہا جا رہا ہے مارچ کے لیے راستے بند نہیں کریں گے، دوسری طرف ہر ضلعے میں ٹرانسپورٹ اور پیٹرول پمپ بند کیے گئے، قوم کو مشقت میں نہ ڈالا جائے، لوگ موٹر سائیکل، سائیکل، اونٹوں پر اور پیدل جائیں گے، دو مہینے بھی انتظار کرنا ہو تو کریں گے، مارچ ہو کر رہے گا۔
جے یو آئی ف کے سربراہ نے کہا کہ اسلام آباد پہنچنے کے بعد رکنے کی مدت رہبر کمیٹی طے کرے گی، ہم حالیہ الیکشن اور مینڈیٹ کو تسلیم نہیں کرتے، مذاکراتی ٹیم کو چاہیے وزیر اعظم کا استعفیٰ ساتھ لے کر آئے۔
