کراچی : پیپلز پارٹی کے رہنما منظور وسان نے کہا ہے کہ مچ اور اڈیالہ جیل سمیت ملک کی تمام جیلوں کی صفائی مکمل ہوچکی ہے، آئندہ تین ماہ تمام جماعتوں کے لیے اہم ہیں۔
تفصیلات کے مطابق پاکستان پیپلز پارٹی مرکزی رہنما منظور وسان نے کہا ہے کہ آئندہ تین ماہ ملک کی تمام جماعتوں کے لیے بہت اہم ہیں، پاکستان تحریک انصاف، مسلم لیگ نواز اور گرینڈ ڈیموکریٹک الائنس والے جیلوں کی ہوا کھائیں گے۔
رہنما پیپلز پارٹی نے کہا ہے کہ مچ اور اڈیالہ جیل سمیت پاکستان کی تمام جیلوں کی صفائی ہوچکی ہے، پیپلز پارٹی کے رہنما اور کارکنان دونوں جیل دیکھ چکے ہیں، دوسروں کے لیے جیل جانا مسئلہ ہوگا۔
رہنما پی پی پی منظور وسان نے کا کہنا تھا کہ جیلوں میں گرمی ہوگی سردی بھی ہوگی اور انچارج میں ہوں گا۔
منظور وسان نے کہا ہے کہ اعتراز احسن صدر مملکت کے انتخاب کے لیے متفقہ امیدوار ہوں گے، انہوں نے دعویٰ کیا ہے کہ فضل الرحمٰن اچانک پاکستان پیپلز پارٹی کو سرپرائز دیں گے۔
یاد رہے کہ پیپلز پارٹی کے سینیئر رہنما نے کہا تھا کہ مستقبل میں خلائی مخلوق بہت کچھ کرنے والی ہے، اسے مہلت ملے گی، ضد کرنے والا باہر ہوجائے گا۔
