لاہور: جے یو آئی (ف) کے سربراہ مولانا فضل الرحمان کا کہنا ہے کہ نواز شریف اور ان کے خاندان کو ناحق ستایا گیا یہ سیاہ باب رہے گا۔
اے آر وائی نیوز کے مطابق صدر ن لیگ شہباز شریف سے سربراہ پی ڈی ایم مولانا فضل الرحمان نے ملاقات کی، دونوں قائدین کی مجموعی سیاسی صورتحال، شفاف، آزادانہ، منصفانہ الیکشن پر گفتگو کی گئی اور فضل الرحمان نے نواز شریف کی وطن واپسی کے حوالے سے نیک تمناؤں کا اظہار کیا۔
دونوں قائدین نے مشاورت اور اشتراک عمل سے آگے بڑھنے کا فیصلہ کیا اور اتفاق کیا کہ بحرانوں سے مل کر ہی نمٹا جاسکتا ہے۔
مولانا فضل الرحمان نے کہا کہ نواز شریف کی وطن واپسی پاکستان کے لیے اچھی خبر ہے، سچ بے نقاب ہوچکا ہے کہ نواز شریف سیاسی انتقام کا نشانہ بنائے گئے، انہیں اور ان کے خاندان کو ناحق ستایا گیا یہ تاریخ کا سیاہ باب رہے گا۔
انہوں نے کہا کہ نواز شریف نے خبرپختونخوا میں پی ٹی آئی کا مینڈیٹ تسلیم کیا اس کے باوجود نواز شریف کو ہی سیاسی نظام سے باہر کریا گیا، سیاسی رہنماؤں کو ناحق چور ڈاکو کہنا سیاسی انجینئرنگ کا کھیل تھا۔
دوسری جانب شہباز شریف نے کہا کہ 16 ماہ پاکستان کا دیوالیہ ہونے سے بچانے میں آپ بھرپور تعاون کیا، تمام جماعتوں نے 16 ماہ میں سیاست کا نہیں صرف ریاست بچانے کا سوچا۔
انہوں نے کہا کہ قائد نواز شریف کی وطن واپسی کے بعد سیاسی و جمہوری نظام مضبوط ہوگا، پاکستان کو اتحاد، مشاورت اور اشتراک عمل ہی بحرانوں سے نکال سکتا ہے۔
