اسلام آباد: فیڈرل بورڈ آف ریونیو ایف بی آر نے انکم ٹیکس ریٹرن جمع کرانے کی تاریخ میں 15 روز کی توسیع کر دی۔
تفصیلات کے مطابق فیڈرل بورڈ آف ریونیو کی جانب سے انکم ٹیکس ریٹرن جمع کرانے کی تاریخ میں 15 روز کی توسیع کر دی گئی۔ ایف بی آر نے ٹیکس ریٹرن فائل کرنے کی تاریخ میں چوتھی بار توسیع کی ہے۔
ایف بی آر کے مطابق شہری اب 31 دسمبر تک اپنے انکم ٹیکس ریٹرن جمع کراسکتے ہیں۔ ایف بی آر کا کہنا ہے کہ 13 دسمبر تک 19 لاکھ ٹیکس ریٹرن جمع کرائے گئے جبکہ سال 2018 میں تقریباََ 27 لاکھ ٹیکس ریٹرن جمع کرائے گئے تھے۔
شبر زیدی کا امریکا جیسا جدید ٹیکس سسٹم لانے کا عندیہ
یاد رہے کہ گزشتہ ماہ فیڈرل بورڈ آف ریونیو (ایف بی آر) کے چیئرمین شبر زیدی کا کہنا تھا کہ ایف بی آر کے سسٹم کو زیادہ سے زیادہ خود کار بنانے کی کوشش کررہے ہیں، امریکا کی طرز پر ٹیکس گزاروں کی معلومات جمع کی جائیں گی۔
چیئرمین ایف بی آر کا کہنا تھا کہ سیلز ٹیکس کی رجسٹریشن اب آن لائن کی جاسکتی ہے، آئندہ سال فیس لیس ای آڈٹ سسٹم متعارف کرائیں گے جس کی مدد سے معلوم ہوگا کہ کون آڈٹ کر رہا ہے، ورلڈ بینک کی معاونت سے ٹیکس قوانین اور ایف بی آر کے پراسیس پیچیدہ ہیں جنہیں آسان بنایا جا رہا ہے۔
