کوئٹہ: تجارتی عمل کو سہل بنانے کے لیے فیڈرل بورڈ آف ریونیو (ایف بی آر) نے صوبہ بلوچستان میں بڑی تعداد میں تعیناتیاں کی ہیں۔
تفصیلات کے مطابق فیڈرل بورڈ آف ریونیو (ایف بی آر) نے صوبہ بلوچستان میں تجارتی سہولتوں کی فراہمی کی بھرپور کوششیں کرتے ہوئے اپریزمنٹ اینڈ انفورسمنٹ کلکٹریٹ کی نگرانی کے لیے چیف کلکٹر تعینات کردیا۔
ترجمان ایف بی آر کے مطابق چیف کلکٹر پاکستان کسٹم سروس کے گریڈ 21 کے سینئر افسر کو تعینات کیا گیا ہے۔ اسمگلنگ روکنے کے لیے ماڈل کسٹمز کلکٹریٹ پری وینٹو یونٹ بھی کوئٹہ میں قائم کردیا گیا ہے۔
ترجمان کا کہنا ہے کہ مختصر اسٹاف اور لاجسٹکس کے ساتھ اینٹی اسمگلنگ یونٹس تشکیل دیے گئے ہیں۔
ترجمان کا مزید کہنا ہے کہ طویل اور غیر محفوظ پاک افغان سرحد پر بھی عملے کو تعینات کیا گیا ہے، اقدامات سے کسٹمز کلیئرنس تیز ت رہوگی اور تجارت میں سہولت ملے گی۔
ترجمان کے مطابق تفتان، پنجگور اور چمن بارڈر کے کسٹمز اسٹیشنز میں مناسب تعداد میں عملہ تعینات کیا گیا ہے۔ جلد ہی خراب اشیا کی خود کار نظام سے کلیئرنس کو بھی یقینی بنایا جاسکے گا۔
ایف بی آر کی جانب سے کہا گیا ہے کہ تمام کسٹم دفاتر فوری طور پر کلیئرنس کو یقینی بنائیں۔