اسلام آباد : فیڈرل بورڈ آف ریونیو ( ایف بی آر) کو حالیہ ٹیکس آرڈیننس سے 70 ارب روپے کی ریکوری کا امکان ہے جبکہ 250 ارب روپے کے مقدمات 100 فیصد ایف بی آر کے جیتنے کے امکانات ہیں۔
تفصیلات کے مطابق حالیہ ٹیکس آرڈیننس سے ایف بی آر کو 30 جون تک 70 ارب روپے کی ریکوری کا امکان ہے، ذرائع نے بتایا کہ ایف بی آر کو آئندہ چند ماہ میں عدالتوں میں پھنسے 250 ارب روپے مل سکتے ہیں۔
ایف بی آر کے ذرائع نے کہا کہ سپریم کورٹ اور ہائیکورٹ میں ٹیکس پر مخصوص آئینی بینچ قائم ہو چکے ہیں، مختلف عدالتوں میں ایف بی آر کے 850 ارب روپے کے مقدمات زیر التوا ہیں، 250 ارب روپے کے مقدمات 100 فیصد ایف بی آر کے جیتنے کے امکانات ہیں۔
ذرائع کا کہنا تھا کہ حال ہی میں دو مختلف کمپنیوں سے 20 ارب روپے جمع کیے گئے ہیں، عدالتوں میں سپر ٹیکس سے متعلق 200 ارب کے کیسز زیر التوا ہیں، مختلف ٹریبونلز میں اس وقت 600 ارب روپے کے ٹیکس کے مقدمات ہیں۔
