اسلام آباد : فیڈرل بورڈ آف ریونیو (ایف بی آر) کو رواں مالی سال کے ماہ اپریل میں 110ارب روپے سے زائد ریونیو شارٹ فال کا سامنا کرنا پڑا۔

اس حوالے سے ذرائع کا کہنا ہے کہ ایف بی آر کو اپریل کے دوران 963 ارب روپے اکٹھے کرنا تھے، ایف بی آر اپریل کے دوران 850 ارب روپے سے زائد اکٹھے کرسکا۔

ذرائع کے مطابق جولائی سے اپریل ریونیو شارٹ فال 815 ارب سے زیادہ ہوگیا، ایف بی آر کو جولائی سے اپریل 10 ہزار 130ارب اکھٹے کرنا تھے۔

چیئرمین ایف بی آر راشد لنگڑیال کا کہنا ہے کہ سالانہ بنیادوں پر 30فیصد ریونیو گروتھ ریکارڈ ہوئی، ٹیکس ٹو جی ڈی پی تناسب آئی ایم ایف شرط کے مطابق ہے۔

انہوں نے کہا کہ وفاقی بورڈ آف ریونیو نے ایک اہم سنگ میل عبور کیا ہے، اپریل2025کیلئے ٹیکس وصولیوں میں30فیصد ماہانہ اضافہ ریکارڈ کیا ہے۔

ایف بی آر کی اپریل 2025 کیلئے مقرر کردہ 9،300 ارب ہدف سے تجاوز کرگئی، 43ارب کے ریفنڈز جاری کرنے کے باوجود ٹیکس وصولیوں میں اضافہ برقرار ہے۔

انکم ٹیکس میں44فیصد، سیلز ٹیکس کی مد میں17فیصد اضافہ ریکارڈ کیا گیا، فیڈرل ایکسائز ڈیوٹی میں 31 فیصد، کسٹم ڈیوٹی میں 31 فیصد اضافہ ریکارڈ کیا گیا۔