The news is by your side.

Advertisement

عوام سیلز ٹیکس طلب کرنے والے غیر رجسٹرڈ افراد کی نشان دہی کریں: ایف بی آر

کچھ افراد ایف بی آر کا نمایندہ بن کر عوام کو ای میلز کر رہے ہیں، ایسے افراد سے خبردار رہیں: شبر زیدی

کراچی: فیڈرل بورڈ آف ریونیو نے عوام سے اپیل کی ہے کہ خریداری کے وقت اگر ان سے سیلز ٹیکس طلب کیا جائے اور وہ خود غیر رجسٹرڈ ہوں تو ایسے تاجروں کی نشان دہی کریں۔

تفصیلات کے مطابق ایف بی آر کا کہنا ہے کہ عوام سیلز ٹیکس طلب کرنے والے غیر رجسٹرڈ افراد کی نشان دہی کریں، سیلز ٹیکس میں رجسٹرڈ تاجر ہی اپنی اشیا کی فروخت پر سیلز ٹیکس لے سکتا ہے۔

غیر رجسٹرڈ تاجروں سے متعلق عوام کی جانب سے شکایات پر ایف بی آر نے سرکلر جاری کر دیا۔

ایف بی آر کا کہنا ہے کہ سیلز ٹیکس میں رجسٹرڈ افراد کو 13 ہندسوں والا سیلز ٹیکس نمبر جاری کیا جاتا ہے، عوام تاجروں سے سیلز ٹیکس نمبر والی رسید طلب کر سکتے ہیں۔

ایف بی آر نے یہ بھی کہا کہ این ٹی این نمبر سیلز ٹیکس رجسٹرڈ نمبر کا متبادل نہیں ہے، جب کہ عوام کو یاد رکھنا چاہیے کہ سیلز ٹیکس میں غیر رجسٹرڈ تاجروں کو سیلز ٹیکس وصولی کا بالکل اختیار نہیں۔

ادھر ایف بی آر کے چیئرمین شبر زیدی کی جانب سے ایک بیان جاری ہوا ہے جس میں متنبہ کیا گیا ہے کہ کچھ افراد ایف بی آر کا نمایندہ بن کر عوام کو ای میلز کر رہے ہیں، عوام ایسے افراد سے خبردار رہیں۔

چیئرمین ایف بی آر کا کہنا ہے کہ ٹیکس ریفنڈ کا جھانسا دے کر بینک اکاؤنٹس تفصیلات لی جا رہی ہیں، ایف بی آر کا ان مذموم حرکات سے کوئی تعلق نہیں، کسی بھی بات کی تصدیق کے لیے ایف بی آر ہیلپ لائن سے معلومات لیں۔

Comments

comments

یہ بھی پڑھیں