چلاس: گلگت بلتستان کے علاقے تانگیر اور داریل میں فرنٹیئر کانسٹیبلری اور پولیس کی بھاری نفری داخل ہوگئی، دہشت گردوں کی تلاش کے سلسلے میں عوام نے فورسز کا استقبال کیا۔
تفصیلات کے مطابق چلاس میں داخل ہونے والے فورسز کے قافلے کو عوام کی بڑی تعداد نے ریلی کی شکل میں تانگیر پہنچایا، فورسز کی آمد کا مقصد پہاڑوں پر دہشت گردوں کی تلاش ہے۔
دیامر جرگے کے عمائدین نے سیکورٹی فورسز کا شان دار استقبال کیا، دیامر جرگہ دہشت گردوں کی تلاش کے سلسلے میں فورسز کی مدد کرے گا۔
ڈی آئی جی کا کہنا ہے کہ پہاڑوں میں موجود دہشت گردوں اور سہولت کاروں کی ایک فہرست بنائی گئی ہے جو دیامر جرگے کے حوالے کی جا چکی ہے۔
ڈی آئی جی گوہر نفیس نے دہشت گردوں کی گرفتاری کی تصدیق کرتے ہوئے میڈیا کو بتایا کہ چار دہشت گردوں کو گرفتار کیا جا چکا ہے۔
چلاس میں لڑکیوں کے 12 اسکول نذر آتش
خیال رہے کہ مذکورہ چار دہشت گردوں کو دیامر جرگے نے داریل میں پکڑا تھا، جرگہ ان دہشت گردوں کو کل پولیس کے حوالے کرے گا۔
مقامی لوگوں نے پہاڑوں پر سہولت کاروں اور دہشت گردوں کی تلاش شروع کر دی ہے، ایف سی کی آمد پر تلاش کا عمل مزید تیز ہو جائے گا۔
واضح رہے کہ گلگت بلتستان میں کچھ عرصے سے مسلسل دہشت گردی کے واقعات رونما ہو رہے ہیں، دو دن قبل گرگاہ نالہ میں تین پولیس اہل کاروں کو شہید کردیا گیا تھا جب کہ تین اگست کو چلاس میں لڑکیوں کے 12 اسکول نذرِ آتش کیے گئے تھے۔
