کراچی : پورٹ قاسم پر ایڈیبل آئل کی شپمنٹس کی کلئیرنگ نہ ہونے کے باعث پاکستان میں گھی اور کوکنگ آئل کی قلت کا خدشہ پیدا ہو گیا ہے۔
تفصیلات کے مطابق پاکستان وناسپتی ایسوسی ایشن کے چئیرمین شیخ عمر ریحان نے گھی اور کوکنگ آئل کی قلت کا خدشہ ظاہر کرتے ہوئے کہا ہے کہ پورٹ قاسم پر ایڈیبل آئل کی شپمنٹس کی کلئیرنگ گزشتہ ایک ہفتہ سے رکی ہوئی ہیں۔
شیخ عمر ریحان کا کہنا تھا کہ پورٹ قاسم ٹرمینل پر شپمنٹس اتارنے کی جگہ نہیں ہے، پورٹ قاسم پر بیرون ملک سے سامان او ر خوردنی تیل لانے والے جہاز برتھ کے انتظار میں سمندر میں قطاروں میں لنگر انداز ہیں۔
انھوں نے بتایا کہ کلیئرنگ نہ ہونے کی وجہ سے خوردنی تیل کی قلت کا مسئلہ پیدا ہو گیا ہے۔
چیئرمین پاکستان وناسپتی ایسوسی ایشن نے کہا کہ کنسائنمنٹ تاخیر سے کلئیر ہونے سے ڈیمریجز اور دیگر جرمانے لگ رہے ہیں، کسٹم کا سافٹ ویئر پی ایس ڈبلیو کی بندش سے معیشت کو شدید نقصان پہنچ رہا ہے۔
ان کا مزید کہنا تھا کہ کلیئرنگ نہ ہونے سے امپورٹرز کو اربوں روپے کے نقصان کا سامنا ہے۔
