وزیراعظم شہباز شریف نے کہا ہے کہ 8 فروری کے بعد اپوزیشن کے غیرسیاسی رویوں نے ان کے حامیوں اور عوام کو بددل کیا۔
تفصیلات کے مطابق وزیراعظم شہباشریف نے ضمنی انتخابات میں نومنتخب ارکان قومی و صوبائی اسمبلی کو مبارکباد دیتے ہوئے کہا کہ مسلم لیگ ن کے نومنتخب ارکان کی جیت عوام کے اعتماد کا مظہر ہے۔ ضمنی انتخاب میں ن لیگ کو ووٹ دینے پرعوام کا تہہ دل سے شکریہ ادا کرتے ہیں۔
شہباز شریف نے کہا کہ کامیابی مہنگائی میں کمی، خارجہ تعلقات کی بہتری کی حکومتی خدمت کا عوامی اعتراف ہے۔ معاشی بہتری اور عوامی ریلیف میں اضافہ ہوگا، عوامی رائے مزید تبدیل ہوگی۔
انھوں نے کہا کہ عالمی مالیاتی اداروں اور خبررساں اداروں نے معاشی بہتری کی پیش گوئیاں کیں۔ سرویز میں معاشی بہتری کی پیش گوئیوں نے بھی عوام کی رائے پر مثبت اثرڈالا۔
وزیراعظم نے کہا کہ عوام کو یقین دلاتے ہیں کہ ان کی خدمت میں کوئی کسر اٹھا نہیں رکھیں گے۔ پوری دیانتداری اور محنت سے عوام کے اعتماد پر پورا اترنے کی کوشش کریں گے۔
شہباز شریف نے کہا کہ معاشی بہتری کے آثار کے ساتھ عوامی رائے میں تبدیلی بھی نمایاں ہورہی ہے۔ ن لیگ کے امیدواروں کی کامیابی معیشت کی بحالی میں حکومتی خدمت کا اعتراف ہے۔
وزیراعظم نے کہا کہ ہارجیت انتخابی عمل کا حصہ ہے، الزامات کے بجائے سیاسی تعاون کی راہ اپنانا ہی جمہوری رویہ ہے۔ انتخابی عمل میں خامیوں اور اعتراضات کو باہمی تعاون اور بات چیت سے ہی دور کیا جاسکتا ہے۔
