اسلام آباد : میٹرک کے نتائج کا اعلان کردیا گیا، نتائج میں کامیاب طلباء کی کامیابی کا تناسب 88 فیصد رہا۔
تفصیلات کے مطابق فیڈرل بورڈ نے میٹرک کے نتائج کا اعلان کردیا، امتحان میں تقریباً تین لاکھ امیدواروں نے حصہ لیا ، جس میں ایک لاکھ چھیانوے ہزار آٹھ سو طلباء کامیاب ہوئے۔
نتائج میں کامیاب طلباء کی کامیابی کا تناسب 88 فیصد رہا، میٹرک پارٹ ٹو سائنس گروپ میں 1087 نمبر کے ساتھ زبادیہ نسیم کی پہلی پوزیشن حاصل کی۔
اس کے ساتھ 1085 نمبرکےساتھ حجاب فاطمہ کی دوسری پوزیشن جبکہ مصادق شہباز اور فاطمہ باجوہ نے 1084 نمبر لے کر تیسری پوزیشن لی۔
اسی طرح ہیومنٹی گروپ میں فیچر فاؤنڈیشن سکول مصریال روڈ راولپنڈی کینٹ سے تعلق رکھنے والی اقصی فاروق نے 1032 نمبر لے کر پہلی ، ڈی ایچ اے سنیئر سکول برائے خواتین ڈی ایچ اے لاہور سے اونایزہ جلیل نے 1025 نمبر حاصل کر کے دوسری اور انسٹیٹیوٹ آف اسلامک سائنس سترا میل اسلام آباد سے محمد انس نے 1014 نمبر لے کر تیسری پوزیشن حاصل کی ۔
تقریب سے خطاب کرتے ہوئے چیئرمین وفاقی تعلیمی بورڈ سید جنید اخلاق نے وفاقی سیکرٹری تعلیم کو امتحانی نظام کے بارے میں بریف کیا اور پوزیشن حاصل کرنے والے بچوں کو مبارکباد پیش کی۔
اس موقع پر مہمان خصوصی وفاقی سیکرٹری تعلیم محی الدین احمد وانی نے خطاب کرتے ہوئے کہا کہ مجھے خوشی ہے کہ بطور سیکرٹری تعلیم ذمہ داریاں نبھانے کا موقع ملا ہے، یہ ہماری کامیابی ہے کہ آج دنیا بھر میں پاکستانی ہونہار بچے اپنا مقام رکھتے ہیں۔
انہوں مزید کہا کہ ہم سرکاری سکولوں میں تعلیم کے معیار کو بہتر بنانے کیلئے کوشاں ہیں، میں کامیاب ہونے والے ہونہار طلباء کو مبارکباد پیش کرتا ہوں۔
تقریب کے اختتام پر وفاقی سیکرٹری تعلیم محی الدین احمد وانی، چیئرمین فیڈرل بورڈ سید جنید اخلاق اور سیکرٹری فیڈرل بورڈ ڈاکٹر بشیر خان نے پوزیشن حاصل کرنے والے بچوں میں انعامات تقسیم کیے۔
