اسلام آباد : وفاقی حکومت نے آئندہ مالی سال 2021-2020 کے بجٹ میں آزاد کشمیر اور گلگت بلتستان کےلیے 40 ارب روپے ترقیاتی فنڈز مختص کردئیے۔
اسپیکر اسد قیصر کی زیر صدارت قومی اسمبلی کا بجٹ اجلاس ہوا جس میں وزیر اعظم عمران خان نے بھی شرکت کی، وفاقی وزیر برائے صنعت و پیداوار حماد اظہر نے آئندہ مالی سال 2020-2021 کے لیے 72 کھرب 94 ارب 90 کروڑ روپے کا بجٹ پیش کیا جو گزشتہ مالی سال کے مقابلے میں گیارہ فیصد کم ہے۔
حماد اظہر نے کہا کہ موسمیاتی تبدیلی کےلیے پاکستان پر بھی بہت سے اثرات مرتب ہورہے ہیں جیسے غیر موسمی بارشیں، فصلوں کے پیداواری رجحان میں کمی اور سیلاب کی تباہ کاریاں۔ اسی لیے ان موسمیاتی تبدیلیوں سے نمٹنے کےلیے پاکستان بھی خود کو تیار کررہا ہے۔
انہوں نے بتایا کہ آئندہ مالی سال کے بجٹ میں موسمیاتی تبدیلی کے تناظر اور ماحول پر ظاہر ہونے والے اثرات سے نمٹنے کےلیے 6 ارب روپے کی رقم مختص کی گئی ہے۔
وفاقی حکومت نے خصوصی علاقہ جات اور رواں بجٹ کے تحت مختص رقوم کے علاوہ آزاد کشمیر اور گلگت بلتستان کےلیے چالیس ارب روپے کے ترقیاتی فنڈز رکھے ہیں جبکہ خیبر پختونخوا کے ضم شدہ اضلاع میں جاری مختلف منصوبوں کیلئے 48 ارب روپے کی رقم مختص کی ہے۔
حماد اظہر نے بتایا کہ وفاقی حکومت نے سسٹین ایبل ڈولپمنٹ گولز (ایس ڈی جی) پروگرام کے تحت جاری ترقیاتی منصوبوں کےلیے 24 ارب روپے کی رقم رکھی گئی ہے جبکہ تحفظ خوراک و ذرات (فوڈ سیکیورٹی) کےلیے بارہ ارب روپے کی فنڈز مختص کیے گئے ہیں۔
وفاقی وزیر برائے صنعت و پیداوار حماد اظہر نے بجٹ پیش کرتے ہوئے کہا کہ خیبرپختونخوا کے ضم شدہ اضلاع میں ٹی ڈی پیز کے اضام و انصرام 20 ارب کی رقم مختص کی جارہی ہے جبکہ افغانستان کی بحالی میں معاونت کےلیے دو ارب روپے کے فنڈز مختص کیے جارہے ہیں۔
مالی سال 2020-2021: 72 کھرب 94 ارب 90 کروڑ روپے کا بجٹ پیش، عوام کے لیے ریلیف
واضح رہے کہ حماد اظہر نے بجٹ تقریر کے دوران بتایا تھا کہ رواں مالی سال کے دوران کرنٹ اکاؤنٹ خسارے میں 73 فیصد کمی ہوئی، پی ٹی آئی حکومت نے تجارتی خسارے میں 31 فیصد کمی کی، 9 ماہ میں تجارتی خسارے میں 21 فیصد کمی کی گئی، تجارتی خسارہ 21 ارب ڈالر سے کم ہو کر 15 ارب ڈالر رہ گیا، ایف بی آر کے ریونیو میں 15 فیصد اضافہ ہوا۔
