اسلام آباد : آئندہ مالی سال کا وفاقی بجٹ 7 کے بجائے 10 جون کو پیش ہوگا، وزیر خزانہ محمد اورنگزیب بجٹ پیش کریں گے۔
تفصیلات کے مطابق وزیراعظم کے دورہ چین کے باعث وفاقی بجٹ تاخیر کا شکار ہے، ذرائع کا کہنا ہے کہ آئندہ مالی سال 2024-25 کا بجٹ 10 جون کو پیش ہوگا۔
ذرائع نے بتایا ہے کہ وزیراعظم شہبازشریف 8 جون کو چین سےوطن واپس پہنچیں گے، اس سے قبل بجٹ 25-2024 سات جون کو پیش ہونا تھا۔
وزارت خزانہ کے عہدیدار کا کہنا ہے کہ آئی ایم ایف سے نئے قرضے سے قبل سب سے اہم بجٹ ہوگا۔
خیال رہے وزیراعظم شہبازشریف 4 سے 8 جون تک چین کا سرکاری دورہ کریں گے، شہبازشریف چینی قیادت کی دعوت پردورہ کررہے ہیں۔
دورے کے دوران شہبازشریف کی چینی صدر اوروزیراعظم سمیت دیگراہم رہنماؤں سے ملاقاتیں ہوں گی، جس میں باہمی دلچسپی کے امور پر تبادلہ خیال کیا جائے گا اور دونوں ملکوں کےدرمیان مختلف معاہدوں پر دستخط ہوں گے۔
وزیراعظم بیجنگ کےعلاوہ چینی صوبوں گوانگ ڈونگ،شانزی کا بھی دورہ کریں گے۔
