اسلام آباد : وزیراعظم عمران خان کی زیر صدارت وفاقی کابینہ کے اجلاس میں این 95 ماسک، پی پی ایز کی برآمد کی اجازت اور پٹرول بحران پرقائم انکوائری کمیشن میں نئےارکان شامل کرنے کی منظوری دے دی۔
تفصیلات کے مطابق وزیراعظم عمران خان کی زیر صدارت وفاقی کابینہ کا اجلاس ہوا، جس میں ملکی صورتحال سمیت 13 نکاتی ایجنڈے پر غور کیا گیا اور وزیراعظم کو دو سالہ ولولہ انگیز قیادت اور اندرونی و بیرونی چیلنجز کے مقابلے پر خراج تحسین پیش کیا گیا۔
ذرائع کا کہنا ہے کہ کابینہ نے پی ٹی وی پر لازمی سروسز ایکٹ نافذ کرنے کی منظوری اور این 95 ماسک، پی پی ایز کی برآمد کی اجازت دے دی جبکہ سیکورٹیز پیپر لمیٹڈ کراچی پر بھی لازمی سروسز ایکٹ میں توسیع کی منظوری دے گئی۔
کابینہ نے سیکیورٹی پرنٹنگ کے ملازمین پر لازمی سروسز ایکٹ کے نفاذ میں توسیع ، پاک ایران انوسٹمنٹ کےڈائریکٹرعباس دانشورکی مدت میں 3سال کی توسیع منظور کرلی۔
اجلاس میں اینٹی ٹیررازم ایکٹ 1997 کے اختیارات سےمتعلق تجاویز پٹرول بحران پرقائم انکوائری کمیشن میں نئے ارکان شامل کرنے کی منظوری دی گئی۔
وفاقی کابینہ نےانکوائری کمیشن میں دو نئے ممبران شامل کرنے کی منظوری دی، کمیشن پٹرول بحران سے متعلق تحقیقات کرے گا اور پٹرول بحران کےمرتکب افراد کی نشاندہی اورسزائیں تجویز کرے گا۔
اجلاس میں سیکٹرجی 12، 13 اور14کے ماو ایریا کی زمین کے استعمال کے طریقے کی منظوری دی جبکہ کابینہ کو پنشن فنڈ کے قیام اور حکومت کی 2سالہ کارکردگی پر تفصیلی بریفنگ دی گئی۔
کابینہ کو بجلی فراہم کرنے والی کمپنیوں کے بورڈز کی تنظیم نو پر بھی بریفنگ دی گئی۔
