اسلام آباد: وزیرِ اعظم عمران خان نے وفاقی کابینہ میں توسیع کا فیصلہ کرتے ہوئے 4 نئے وزرا کابینہ میں شامل کر دیے ہیں، جن میں تین وفاقی وزیر اور ایک وزیرِ مملکت ہوں گے۔
تفصیلات کے مطابق عمر ایوب خان، علی زیدی، محمد میاں سومرو کو وفاقی وزیر جب کہ مراد سعید کو وزیرِ مملکت بنائے جانے کا فیصلہ ہوا ہے۔
وزیرِ اعظم ہاؤس کے ترجمان نے بتایا کہ عمر ایوب کو توانائی، علی زیدی کو بحری امور اور میاں محمد سومرو کو نج کاری کا قلم دان دینے کا فیصلہ کیا گیا ہے۔
ترجمان وزیرِ اعظم کے مطابق مراد سعید کے قلم دان کا اعلان بعد میں کیا جائے گا، چار نئے وزرا کی شمولیت سے وزیرِ اعظم کی کابینہ کے ارکان کی تعداد 27 ہوگئی ہے۔
پنجاب کابینہ کرپشن کے خاتمے کیلئے اپنا بھرپور کردارادا کرے، وزیراعظم
خیال رہے کہ دس دن قبل وزیرِ اعظم عمران خان نے وفاقی کابینہ میں توسیع کا فیصلہ کیا تھا، اس فیصلے پر عمل در آمد صدارتی انتخاب کے بعد ہونا تھی۔
وزیرِ اعظم عمران خان نے پنجاب کابینہ کو ٹاسک دیتے ہوئے کہا تھا کہ وہ کرپشن کے خاتمے کے لیے اپنا بھرپور کردار ادا کرے، پنجاب سے بد عنوانیوں کا خاتمہ سب سے بڑا چیلنج ہے۔
