کراچی : وفاقی حکومت نے کراچی کے3ترقیاتی منصوبوں میں ریکارڈ بچت کی ، تینوں منصوبوں میں 25کروڑ روپے کی بچت ہوئی جبکہ وسطی میں سڑکوں کی استرکاری اورمرمت کافیصلہ کیا گیا ہے۔
تفصیلات کے مطابق سندھ انفرااسٹرکچر ڈویلپمنٹ کمپنی نے وفاقی حکومت کے کراچی میں 5 منصوبوں کی تکمیل سے آگاہ کرتے ہوئے بتایا 3ترقیاتی منصوبوں میں ریکارڈ بچت ہوئی۔
.
ذرائع ایس آئی ڈی سی ایل کا کہنا تھا کہ تاخیرکےباوجودلاگت بڑھنے کے بجائے کروڑوں کی بچت ہوئی ، سخی حسن ، فائیو اسٹار ، کے ڈی اے چورنگی پر 3 فلائی اوورز تعمیرکئےگئے، تینوں منصوبوں میں 25کروڑ روپے کی بچت ہوئی، بچت سندھ انفرااسٹرکچر ڈویلپمنٹ کمپنی نے کی۔
وفاقی حکومت نے وسطی میں سڑکوں کی استرکاری اور مرمت کا فیصلہ کرلیا ہے اور سخی حسن چورنگی کےاطراف کی سڑکوں کی تعمیر شروع کردی گئی ہے ، کےڈی اے، فائیو اسٹار چورنگی فلائی اوورز کے اطراف سڑکیں تعمیر ہوں گی۔
ایس آئی ڈی سی ایل نے بتایا نشتر روڈ اور منگھوپیر روڈ فیز ون کی تعمیر بھی مکمل ہوچکی ہے ، فلائی اوورز کو ٹریفک کے لیے کھولا جاسکتاہے۔
یاد رہے گورنر سندھ عمران اسماعیل نے کہا تھا کہ وفاقی حکومت عوام کے مسائل کے حل کے لیے اقدامات کررہی ہے، عوامی فلاح و بہبود کے لیے شروع کیے گئے منصوبے اس بات کا ثبوت ہیں۔
ان کا کہنا تھا کہ سندھ کے عوام کی ترقی و خوشحالی وزیراعظم عمران خان کی ترجیحات میں شامل ہے۔
