اسلام آباد : وزیراعظم عمران خان کی ہدایت پر وفاقی وزراء کے وفد نے نیو اسلام آباد انٹرنیشنل ایئرپورٹ کا دورہ کرکے مسافروں اور تارکین وطن کو دی جانے والی سہولیات کا جائزہ لیا۔
تفصیلات کے مطابق وفاقی وزراء کے وفد نے وزیر اعظم کی خاص ہدایت پر اسلام آباد ایئر پورٹ میں مسافروں اور تارکین وطن کو دی جانے والی سہولیات کا جائزہ لیا۔ وزراء میں فواد چوہدری، شہریارآفریدی، محمدمیاں سومرو، عامرمحمود کیانی شامل تھے۔
وزرا کے وفد نے مسافروں اور تارکین وطن کو ایئرپورٹس پر دی جانے والی سہولیات کاجائزہ لیا، اس موقع پرسول ایوی ایشن اتھارٹی کی جانب سے وفاقی وزراء کو بریفنگ دی گئی۔
وزراء نے اسلام آباد ایئرپورٹ پر افرادی قوت کی کمی کی تفصیلات بھی مانگ لیں، اس کے علاوہ ایئرپورٹ منصوبے کی لاگت میں اضافے اورتعمیر میں غیرمعیاری کام کے ذمہ داروں کی تفصیلات بھی15روز میں طلب کرلیں۔
اس موقع پر وفاقی وزیر فواد چوہدری کا کہنا تھا کہ تارکین وطن کئی گھنٹوں کی طویل مسافت طے کرکے واپس آتے ہیں، انہیں غیر رجسٹرڈ موبائل کی رجسٹریشن کیلئے لائن میں لگنا پڑتا ہے، ایئرپورٹ پر بیت الخلاء کی صفائی یقینی بنائی جائے۔
وزیر مملکت برائے داخلہ شہریارآفریدی نے کہا کہ کسٹم، اےاین ایف اور ایف آئی اے کی کارکردگی قابل تحسین ہے، تینوں حکام ایک ساتھ مسافروں کے سامان کی چیکنگ کرتے ہیں، اسلام آباد ایئرپورٹ پرجدید اسکینر نصب کیے جائیں، جوں ہی کسی غیر ملکی کا پاسپورٹ اسکین ہو اس کی زبان میں ویلکم کہا جائے۔
