اسلام آباد پولیس کی جانب سے پی ٹی آئی کے احتجاج سے نمٹنے کی حکمت عملی تیار کرلی گئی، پنجاب پولیس سے 10 ہزار ڈنڈے مانگ لیے۔

تفصیلات کے مطابق چیف کمشنر اسلام آباد نے اس سلسلے میں پنجاب اور آزاد کشمیر پولیس کو مراسلہ لکھ دیا، پنجاب اور آزاد کشمیر سے 12 بکتربند گاڑیاں بھی مانگی گئییں، اس کے ساتھ ساتھ پنجاب پولیس سے 2 واٹر کینن اور 50 قیدی وینز بھی طلب کی گئی ہیں۔

اس کے علاوہ وفاقی پولیس کی طرف سے آزاد کشمیر پولیس سے بھی 10 قیدی وینز مانگی گئی ہیں، 5 ہزار اینٹی رائٹ کٹس، شیلڈز اور ساتھ ہی 10 ہزار ڈنڈے مانگے گئے ہیں۔

پنجاب پولیس سے 30 ہزار ربڑ بلٹ، ایک ہزار ربڑ بلٹ گنز دینے کی درخواست کی گئی ہے، 20 ہزار لانگ رینج آنسوگیس شیل بھی مانگے گئے ہیں۔

سندھ پولیس سے 20 ہزار شیل، 30 ہزار ربڑ بلٹس، ایک ہزار ربڑ بلٹ گنز مانگی گئی ہیں، صوبہ سندھ کی پولیس سے 500 نئی آنسو گیس شیل گنز بھی طلب کی گئی ہیں۔