اسلام آباد : توہین رسالت کے ملزمان کے خلاف ایکشن شروع کردیا گیا، ایف آئی اے نے فیس بک پر گستاخانہ مواد اپ لوڈ کرنے والوں کی نشاندہی کے لیے اشتہار جاری کردیا ہے۔
تفصیلات کے مطابق سوشل میڈیا پر گستاخانہ مواد کے معاملہ پر اسلام آباد ہائی کورٹ کے حکم پر ایف آئی اے نے کارروائی کا آغاز کردیا ، ملزمان کی نشاندہی میں مدد کے لئے اشتہار جاری کردیئے گئے ہیں، اشتہار میں عوام سے اپیل کی گئی ہے کہ ایسے عناصر جو گستاخانہ کارروائیوں میں ملوث سے متعلق ایف آئی اے کو آگاہ کریں۔
اشتہار میں کہا گیا ہے کہ گستاخانہ مواد جاری کرنے والوں کے خلاف ٹھوس معلومات اور ثبوت سائبر کرائم سیل کو مہیا کریں۔
مزید پڑھیں : ملک کا سب سے بڑامسئلہ توہین رسالت ہے، وزیراعظم کو بلانا پڑا تو بلائیں گے،جسٹس شوکت عزیزصدیقی
گزشتہ روز اسلام آباد ہائی کورٹ نے سوشل میڈیا پر گستاخانہ مواد کامعاملہ وزیر اعظم تک پہنچانے کا حکم دیا تھا، جسٹس شوکت عزیزصدیقی نے کہا تھا کہ ملک کا سب سے بڑامسئلہ توہین رسالت کا ہے،ایکشن نہ ہوا تو وزیراعظم کو طلب کریں گے۔
بعد ازاں اسلام آباد میں پولیس نےگستاخانہ پیجز چلانے والوں کے خلاف ایف آئی آر اسلام آباد ہائی کورٹ کے جسٹس شوکت عزیز صدیقی کے حکم کے بعد درج کی، گستاخانہ پیجزچلانے والوں کےخلاف مقدمہ انسپکٹرارشادابڑوکی مدعیت میں تھانہ رمنا میں درج کیا گیا ، جس میں 295اے اور سی کی دفعات لگائی گئی ۔
اس سے قبل سماعت میں سوشل میڈیا پر گستاخانہ مواد کے معاملے پر اسلام آباد ہائی کورٹ نے سوشل میڈیا پر گستاخانہ مواد اپ لوڈ کرنے میں ملوث افراد کا نام فوری ای سی ایل میں ڈالنے کا حکم دیا تھا اور کہا تھا کہ سوشل میڈیا سے تمام گستاخانہ مواد آج ہی بلاک کیا جائے۔
