فیصل آباد: ایف آئی اے نے تین ماہ سے مفرور انسانی اسمگلر محسن رضا کو گرفتار کر لیا، ملزم نے شہری کو مسقط میں ملازمت دلوانے کا جھانسہ دے کر تین لاکھ ساٹھ ہزار روپے بٹور لئے تھے۔
تفصیلات کے مطابق ایف آئی اے نے فیصل آباد کے نواحی گاؤں لاٹھیاں والا میں کارروائی کرتے ہوئے تین ماہ سے مفرور انسانی اسمگلر محسن رضا کو گرفتار کر کے مقدمہ درج کرلیا ہے۔
ایف آئی اے کے مطابق ملزم محسن رضا اور اس کے ساتھی محمد رمضان کے خلاف جڑاں والا کے رہائشی محبوب علی کی درخواست پر 19 اکتوبر 2016 کو مقدمہ درج کیا گیا تھا، ملزم نے 2015 میں محبوب علی سے اس کے بیٹے کو عثمان کو مسقط میں ملازمت دلوانے کا جھانسہ دے کر تین لاکھ روپے حاصل کیے تھے۔
ایف آئی اے کے مطابق ملزم نے عثمان کو نہ بیرون ملک بھجوایا اور نہ ہی رقم واپس کی جبکہ متاثرہ شہری کی طرف سے رقم کا مطالبہ سامنے آنے پر اُسے ایک لاکھ کا جعلی چیک دیا تھا۔ ایف آئی اے نے گرفتار ملزم کے خلاف مقدمہ درج کرلیا ہے جبکہ مقدمے میں نامزد دوسرے ملزم کی گرفتاری کے لیے چھاپے مارے جارہے ہیں۔
0
20
