کراچی: ایف آئی اے نے جعلی دستاویزات پر سفر کرنیوالے مسافر کو ائیرپورٹ سے گرفتار کرلیا۔
تفصیلات کے مطابق ایف آئی اے امیگریشن کراچی نے کارروائی کرتے ہوئے جعلی دستاویزات پر سفر کرنے والا مسافر گرفتار کرلیا، ملزم پاکستانی پاسپورٹ پر ایران سے کراچی ائیرپورٹ پہنچا تھا۔
ایف آئی اے کے مطابق امیگریشن کلئیرنس کے دوران ملزم کے پاسپورٹ پر لگا جرمن (شینجن) ویزہ مشکوک پایا گیا، مشکوک معلوم ہونے پر پاسپورٹ اور دیگر دستاویزات کو سیکنڈ لائن آفس کے فرانزک پراسیس سے گزارا گیا، پاسپورٹ پر لگے ویزہ پر ضروری سیکیورٹی و دیگر خصوصیات موجود نہ تھیں۔
ایف آئی اے نے کہا کہ ابتدائی تفتیش کے مطابق ملزم نے عمان میں مقیم مبشر نامی ایجنٹ سے سفری دستاویزات بشمول ویزہ و ٹکٹ حاصل کیں اس مقصد کے لیے ملزم نے مذکورہ ایجنٹ کو 20 لاکھ روپے ادا کئے۔
ایف آئی اے حکام کا کہنا ہے کہ ملزم کو گرفتار کر کے مزید قانونی کارروائی کے لیے انسدادِ انسانی سمگلنگ سرکل کراچی منتقل کر دیا گیا ہے۔
