کراچی : جعلی دستاویزات پر امریکا جانے کی کوشش کرنے والے مسافر کو کراچی ایئرپورٹ سے گرفتار کرلیا گیا۔
تفصیلات کے مطابق ایف آئی اے امیگریشن نے جناح انٹرنیشنل ائرپورٹ کراچی پر بڑی کاروائی کرتے ہوئے جعلی سفری دستاویزات پر بیرون ملک جانے والے مسافر کو گرفتار کر لیا۔
ایف آئی اے نے بتایا کہ ملزم نے جعلی دستاویزات پر فلائٹ نمبر GF-753 کے ذریعے کراچی سے امریکہ جانے کی کوشش کی، ملزم کی شناخت محمد مقصود کے نام سے ہوئی۔
ملزم کو امیگریشن کلیئرنس کے دوران مشکوک پایا گیا جبکہ ملزم کے پاسپورٹ پر جعلی ویزہ لگا ہوا تھا جبکہ سیکیورٹی خصوصیات بھی مشکوک پائی گئیں۔
ترجمان کا کہنا تھا کہ ابتدائی تفتیش کے مطابق ملزم اور اس کے بھائی نے مذکورہ ویزہ مہیش کمار اور نعیم احمد کی معاونت سے حاصل کیا ملزم نے اپنے اور خاندان کے پانچ ویزوں کے حصول کے لیے ایجنٹوں کو 60 لاکھ روپے ادا کیے۔
ملزم کو ایجنٹ کی نشاندہی اور مزید قانونی کاروائی کے لئے اینٹی ہیومن ٹریفکنگ سرکل کراچی منتقل کر دیا گیا ہے اور مزید تفتیش جاری ہے۔
اس سے قبل بھی ایف آئی اےامیگریشن نے جناح انٹرنیشنل ایئرپورٹ کراچی پر بڑی کارروائیوں میں جعلی سفری دستاویزات پربیرون ملک جانے والے 2مسافروں کوگرفتار کیا تھا۔
