پشاور: سینئر خاتون سرکاری افسر کے خلاف دوہری ملازمت، مالی دھوکہ دہی اور غیرقانونی طور پر دو تنخواہیں وصول کرنے پر مقدمہ درج کرلیا گیا۔

تفصیلات کے مطابق وفاقی تحقیقاتی ادارے ایف آئی اے کے انسدادِ بدعنوانی سرکل پشاور نے ایک سینئر خاتون سرکاری افسر کے خلاف دوہری ملازمت، مالی دھوکہ دہی غیرقانونی طور پر دو تنخواہیں وصول کرنے پر ایف آئی آر درج کر لی ہے۔

ایف آئی اے کے مطابق ملزمہ حاجراسرور نے ایک ہی وقت میں دو مختلف سرکاری اداروں ڈپٹی ڈائریکٹر کمشنریٹ برائے افغان مہاجرین(سی اے آر) خیبر پختونخواہ اور پاکستان کرکٹ بورڈ (پی سی بی) سے بیک وقت تنخواہیں لے رہی تھی۔

ایف آئی اے کا کہنا ہے ملزمہ نے 2001 سے 2008 اور2017 سے اب تک مالی فوائد حاصل کیے جو کہ سول سرونٹس (کنڈکٹ) رولز 1964 کی کھلی خلاف ورزی ہے، ملزمہ کا نام اسٹاپ لسٹ میں شامل کر دیا گیا ہے تاہم وہ برطانیہ فرار ہوگئی۔

ایف آئی اے کا کہنا ہے کہ ملزمہ کو وطن واپسی پر فوری گرفتاری کیا جائے گا جبکہ ملزمہ کی جائیداد اور بینک اکاؤنٹس منجمد کرنےکی کارروائی شروع کردی گئی ہے۔