اسلام آباد: ایف آئی اے کی ایک کارروائی میں خیبر پختون خوا کے شہر کوہاٹ میں خواتین کے نام پر غیر قانونی سِمز ایکٹو کرنے والی فرنچائزز کا انکشاف ہوا ہے۔
تفصیلات کے مطابق فیڈرل انویسٹیگیشن ایجنسی (ایف آئی اے) کی سائبر کرائم وِنگ نے ڈیرہ اسماعیل خان میں ایک بڑی کارروائی کرتے ہوئے خواتین کے نام پر غیر قانونی سِمز ایکٹو کرنے والی 2 فرنچائز پکڑ لی ہیں۔
ذرائع کا کہنا ہے کہ یہ فرنچائز کوہاٹ میں کام کر رہی تھیں، جہاں پنجاب اور سندھ کی خواتین کے نام پر سمیں ایکٹو کی جاتی تھیں۔
ایف آئی اے ذرائع کے مطابق اس کارروائی کے دوران 20 بائیو میٹرک مشینیں اور 2200 سمیں برآمد کی گئی ہیں، جب کہ 3 ملزمان کو گرفتار کر کے ان کے خلاف مقدمات کا اندراج کر لیا گیا ہے۔
گرفتار ملزمان میں عبیداللہ، نجیب اللہ اور آصف بلال شامل ہیں، تینوں کا تعلق ڈی آئی خان سے ہے، ایف آئی اے حکام کا کہنا ہے کہ ملزمان کے خلاف مزید تفتیش جاری ہے، اور مزید انکشافات سامنے آنے کی توقع ہے۔
