کراچی: ایف آئی اے امیگریشن نے سالانہ کارکردگی رپورٹ جاری کر دی، جس میں کہا گیا ہے کہ سال 2023 کے دوران ایف آئی اے امیگریشن نے بین الاقوامی آمد اور روانگی کی چیک پوسٹوں پر 19.5 ملین مسافروں کو کامیابی سے ایمیگریشن پروسیس کیا۔
رپورٹ کے مطابق سال 2023 کے دوران 9.2 ملین مسافروں میں سے 7.1 ملین پاکستانی اور 2.1 ملین غیر ملکی پاکستان آئے، جب کہ 10.3 ملین مسافروں میں سے 8.1 ملین پاکستانی شہری اور 2.2 ملین غیر ملکی پاکستان سے روانہ ہوئے۔
ملک بھر میں مجموعی طور پر 29 بین الاقوامی آمد و روانگی کی امیگریشن چیک پوسٹس سائٹس/ آپریشنل ہیں، سب سے زیادہ 3.6 ملین پاکستانیوں نے بیرون ملک آمد و روانگی کے لیے لاہور ایئرپورٹ سے سفر کیا، جب کہ اسلام آباد ایئرپورٹ سے 3.5 ملین پاکستانی مسافروں نے سفر کیا، اور سب سے زیادہ 1.1 ملین غیر ملکیوں نے آمد و روانگی کے لیے اسلام آباد ایئرپورٹ سے سفر کیا۔
ایف آئی اے کے انٹیگریٹڈ بارڈر مینجمنٹ سسٹم نے سال کے دوران 2935 اسٹاپ لسٹ کیسز کا کامیابی سے سراغ لگا کر قانون کے مطابق کارروائی کی، انسانی اسمگلروں کے خلاف مہم کے تحت ایف آئی اے نے ملک بھر میں خصوصی کارروائیاں کرتے ہوئے 1602 انسانی سمگلروں کو گرفتار کیا، جب کہ 25 انتہائی مطلوب انسانی اسمگلروں کو بھی گرفتار کیا گیا۔
بھارتی ایئر ٹریفک کنٹرول نے سعودی طیارے کو لینڈنگ دینے سے انکار کر دیا تھا، انکشاف
انسانی اسمگلروں کے خلاف کامیاب کریک ڈاؤن اور بہترین حکمت عملی کے نتیجے میں امریکی محکمہ خارجہ نے اپنی سالانہ ٹریفکنگ ان پرسنز (TIP) رپورٹ 2023 میں پاکستان کی حیثیت کو ٹائر 2 میں برقرار رکھا۔
گزشتہ سال کے دوران 1129 مسافروں کو جعلی دستاویزات کی بنیاد پر آف لوڈ کر کے متعلقہ تھانوں میں منتقل کیا گیا، عمرے کی آڑ میں جانے والے بھکاریوں اور یونان کشتی حادثے جیسے ہولناک واقعات کی روک تھام کے لیے ایئرپورٹس پر سخت اسکریننگ کا آغاز کیا گیا، مسافروں کی پروفائلنگ کے حوالے سے امیگریشن حکام کے لیے خصوصی ٹریننگ کا انعقاد بھی کیا گیا۔
ایف آئی اے حکام کے مطابق انسانی اسمگلنگ کی روک تھام کے لیے ایف آئی اے امیگریشن نے دیگر قانون نافذ کرنے والے اداروں کے ساتھ مل کر مسافروں کے سامان کی چیکنگ کو بھی یقینی بنایا۔
