کراچی: یورپی یونین کے تعاون سے اسلام آباد ایئرپورٹ پر ایف آئی اے امیگریشن کو جدید آلات سے لیس کر دیا گیا۔
تفصیلات کے مطابق ایئر پورٹس پر بارڈر سیکیورٹی کو محفوظ بنانے، جعلی ویزے اور انسانی اسمگلنگ کی روک تھام کے لیے ایف آئی اے نے یورپی یونین کے تعاون سے اسلام آباد ایئرپورٹ پر امیگریشن کو جدید آلات سے لیس کر دیا۔
ڈی جی ایف آئی اے محسن حسن بٹ کے مطابق امیگریشن آفس کو یورپی یونین اور ICMPD کے تعاون سے جدید ترین فرانزک اور آئی ٹی ٹولز سے لیس کیا گیا ہے، اب جدید آلات کے ذریعے مسافروں کے پاسپورٹ اور ویزے کی جانچ پڑتال کی جائے گی۔
انھوں نے کہا کہ جدید آلات کے ذریعے جعلی پاسپورٹ اور ویزے کے حامل مسافروں کی نشان دہی ممکن ہو سکے گی، دوسرے مرحلے میں 2024 تک تمام بڑے ایئر پورٹس پر ایف آئی اے امیگریشن کو جدید آلات سے لیس کیا جائے گا۔
ڈی جی محسن بٹ نے کہا کہ ایف آئی اے جرائم پیشہ اور انسانی اسمگلروں کے خلاف کریک ڈاؤن جاری رکھے ہوئے ہے، تاکہ ملزمان کو ان کے کیفر کردار تک پہنچایا جا سکے، اس سلسلے میں ایف آئی اے پاکستان کے ایئرپورٹس پر بارڈرمینجمنٹ سسٹم کو جدید بنانے کے لیے کوشاں ہے۔
