کراچی میں ڈکیتی کی مزاحمت پر ڈاکوؤں نے سرکاری افسر کو گولی مار دی، ملزمان افسر کا اسلحہ بھی ساتھ لے گئے۔
اے آر وائی نیوز کی رپورٹ کے مطابق کراچی کے علاقے سہراب گوٹھ میں ڈکیتی میں مزاحمت پر مسلح افراد نے ایف آئی اے کے افسر زاہد قیوم کو فائرنگ کرکے شدید زخمی کردیا۔
اس حوالے سے پولیس حکام کا کہنا ہے کہ ڈاکوؤں کی فائرنگ کی زد میں آکر ایک راہگیر بھی زخمی ہوا ہے دونوں زخمیوں کو طبی امداد کیلیے جناح اسپتال منتقل کردیا گیا۔
پولیس کے مطابق فائرنگ کا واقعہ سہراب گوٹھ میں چٹہ گبول گوٹھ میں پیش آیا، اسپتال میں ایف آئی اے افسر زاہد قیوم کی حالت تشویشناک بتائی جارہی ہے۔
،پولیس حکام نے بتایا کہ مذکورہ ایف آئی اے افسر اپنی بیٹی سے ملنے اس کے گھر آیا تھا ، ملزمان نے اسے لوٹنے کی کوشش کی تو افسر نے اپنا سرکاری پستول نکالا۔
تاہم وہ ڈاکوؤں پر فائرنگ نہ کرسکا، ملزمان نے فائرنگ کرکے سے زخمی کردیا اور جاتے ہوئے اس کا پستول بھی ساتھ لے گئے۔
علاوہ ازیں سہراب گوٹھ میں پیش آنے والے ایک اور واقعے میں نامعلوم افراد کی فائرنگ سے ایک شخص زخمی ہوگیا، فائرنگ سے زخمی شخص زاہد کو اسپتال منتقل کردیا گیا ہے۔
یاد رہے کہ وفاقی تحقیقاتی ایجنسی (ایف آئی اے) لاہور زون نے انسانی اسمگلنگ اور ویزا فراڈ میں ملوث دو اہم ملزمان کو گرفتار کیا تھا۔
ایف آئی اے کے ترجمان نے بتایا کہ لاہور اور قصور میں ٹارگٹڈ آپریشن کیے گئے، جس کے نتیجے میں دو ملزمان زاہد مصطفیٰ اور امجد بھٹی کو گرفتار کیا گیا ہے۔
پولیس کو مطلوب مفرور ملزم زاہد مصطفیٰ کو کینیڈا کی جعلی نوکری کا جھانسہ دے کر مجموعی طور پر 3.99 ملین روپے غبن کرنے کے الزام میں گرفتار کیا گیا۔
دوسری جانب امجد بھٹی نامی ملزم نے جعلی روزگار اسکیم چلائی، متعدد شہریوں کو بیرون ملک ملازمت کے جعلی وعدوں سے دھوکہ دیا۔
مصطفیٰ عامر قتل کیس، ارمغان کی پولیس پارٹی پر فائرنگ کی ویڈیو سامنے آگئی
