کراچی: وفاقی تحقیقاتی ایجنسی (ایف آئی اے) سکھر نے جعلی زنانہ آئی ڈی بنا کر مردوں کو بلیک میل اور ہراساں کرنے والے ملزم کو گرفتار کرلیا۔
تفصیلات کے مطابق وفاقی تحقیقاتی ایجنسی (ایف آئی اے) سکھر نے لال گل نامی ملزم کو گرفتار کرلیا، ملزم متعدد مردوں کو بلیک میل اور ہراساں کرنے میں ملوث تھا۔
ایف آئی اے کا کہنا ہے کہ ملزم شکایت کنندگان کی فحش تصاویر اور ویڈیوز شیئر کر رہا تھا، ملزم نے فیس بک پر لڑکی کے نام سے جعلی آئی ڈی بنائی۔ اس آئی ڈی سے وہ مردوں کو ویڈیو کالز کرتا تھا اور ان کی ویڈیوز ریکارڈ کر لیتا تھا۔
ملزم مردوں کو تعلقات کی پیشکش کرتا اور انکار پر فحش ویڈیوز ڈیلیٹ کرنے کے لیے پیسے مانگتا تھا، فی شخص سے 20 سے 30 ہزار روپے مانگے جاتے تھے۔
ایف آئی اے کے مطابق ملزم کے موبائل سے بچوں سمیت 15 افراد کی فحش ویڈیوز برآمد ہوئیں۔ ملزم درجن سے زائد افراد کی بلیک میلنگ میں ملوث ہے، بلیک میل ہونے والوں کا تعلق گھوٹکی کے نواحی علاقوں سے ہے۔
ایف آئی اے کا کہنا ہے کہ گرفتار ملزم کے خلاف مقدمہ درج کر لیا گیا۔
