ماسکو: روس میں جاری فیفا ورلڈ کپ 2018 میں آج پیرو نے آسٹریلیا کو شکست دے دی، جب کہ فرانس اور ڈنمارک کا کانٹے دار میچ برابر رہا۔
تفصیلات کے مطابق عالمی مقابلوں میں آج گروپ سی کے دو اہم میچز ہوئے، جن میں پیرو اور آسٹریلیا، جب کہ فرانس اور ڈنمارک مدمقابل آئیں۔
پیرو بہ مقابلہ آسٹریلیا
میچ سے قبل آسٹریلیا کے پاس ایک پوائنٹ تھا، جب کہ پیرو گروپ میں آخری نمبر پر تھی۔
آسٹریلیا کی ٹیم جیت کی امید کے ساتھ میدان میں اتری۔ البتہ پیرو کے کھلاڑیوں نے اپنی بھرپور صلاحیتوں کا اظہار کیا۔
پیرو نے آسٹریلیا کی پوسٹ پر متعدد حملے کیے اور دو گول داغنے میں کامیاب رہے، یوں آسٹریلیاکو آخری پوزیشن پر اکتفا کرنا پڑا۔
اس میچ کے بعد آسٹریلیا اور پیرو دونوں کا ورلڈ کپ سفر تمام ہوگیا۔
فرانس بہ مقابلہ ڈنمارک
گروپ سی کی ٹاپ ٹیم اور سابق چیمپین فرانس کا سامنا ڈنمارک سے ہوا، تو تجزیہ کار فرانس کو فیورٹ قرار دے رہے تھے، مگر ڈنمارک نے کانٹے دار مقابلہ کیا۔
میچ میں دونوں ٹیموں نے اچھے پاسز کیے اور ایک دوسرے کی پوسٹ پر اٹیک کیے، مگر دونوں ٹیمیں نوئے منٹ تک گول کرنے میں ناکام رہیں۔
میچ کے بعد فرانس چھے پوائنٹس کے ساتھ گروپ میں پہلے، جب کہ ڈنمارک دوسرے نمبر پر ہے۔
فیفا ورلڈ کپ 2018: یوروگوائے نے روس، سعودی عرب نے مصر کو شکست دے دی
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
