ریاض: سعودی عرب نے 2030 کے فٹبال ورلڈکپ کی میزبانی حاصل کرنے کے لیے کوششیں تیز کردیں۔
بین الاقوامی میڈیا رپورٹ کے مطابق سعودی عرب 2030 کے ورلڈکپ کی اٹلی کے ساتھ مشترکہ میزبانی حاصل کرنے کا خواہش مند ہے، جس کے لیے کوششیں شروع کردی گئیں ہیں۔
رپورٹ کے مطابق فٹ بال ورلڈ کپ کی میزبانی حاصل کرنے کے لیے بولی کے انتظامات ابھی ابتدائی مراحل میں ہیں۔
رپورٹ کے مطابق سعودی عرب امریکا میں قائم بوسٹن کنسلٹنسی گروپ اور اٹلی کے ساتھ مل کر بولی میں حصہ لے گا، علاوہ ازیں یہ امکان بھی ہے کہ عرب ممالک مصر اور مورکو کے ساتھ فٹبال ورلڈکپ کی میزبانی کے لیے مشترکہ بولی لگائیں۔
برطانوی میڈیا کے مطابق سعودی عرب گزشتہ چند سالوں کے دوران کھیلوں کے عالمی مقابلوں میں 1.5 ارب ڈالر کی خطیر رقم لگا چکا ہے۔
دوسری جانب یہ بھی اطلاع ہے کہ سعودی عرب اور اٹلی نے یورو فٹبال کپ 2028 کی مشترکہ میزبانی حاصل کرنے پر بھی غور شروع کردیا ہے، دونوں ممالک آئندہ ہونے والی بولی میں مل کر حصہ لیں گے۔
یادر ہے کہ رواں سال برطانوی وزیراعظم بورس جانسن بھی فٹبال ورلڈکپ کی میزبانی کی خواہش کا اظہار کرچکے ہیں۔ انہوں نے اپنے بیان میں کہا تھا کہ ’برطانیہ اور آئر لینڈ مشترکہ طور پر فٹبال ورلڈکپ کی میزبانی حاصل کرنے کے لیے مشترکہ طور پر بولی کا حصہ بنیں گے‘۔
