بھارتی ریاست کرناٹک میں افسوسناک واقعہ پیش آیا جہاں کھیرے پر ہونے والے معمولی جھگڑے نے خاتون کی زندگی کا چراغ گل کر دیا۔
انڈین میڈیا کی رپورٹس کے مطابق چامراج نگر ضلع میں نوجوان نے اپنی بہن پر چاقو سے حملہ کر کے اسے موت کے گھاٹ اتار دیا جبکہ والد اور بھابھی شدید زخمی ہوئے۔
پولیس حکام نے بتایا کہ ملزم نے چاقو سے اہل خانہ پر پے در پئ وار کیے جس سے اس کی 26 سالہ بہن چل بسی، اس نے والد اور بھابھی کو بھی جان سے مارنے کی کوشش کی جو اسپتال میں زیرِ علاج ہیں۔
یہ بھی پڑھیں: معمولی تکرار پر جھگڑا : بیوی کے شوہر پر چھریوں کے وار
ہوا کچھ یوں کہ ملزم اپنی بھانجی کو کھیرا کھلا رہا تھا جو پہلے سے ہی بخار میں مبتلا تھی، بہن نے کھیرا کھلانے سے روکا جس پر دونوں میں تکرار ہوئی۔
تلخ کلامی کے دوران ملزم نے چاقو اٹھا کر بہن کی گردن پر پھیر دیا جس سے وہ موقع پر ہی جان سے گئیں۔ جھگڑے کے دوران ملزم نے والد اور بھابھی پر چاقو کے وار کیے۔
پولیس نے واقعے کا مقدمہ درج کر کے ملزم کو گرفتار کر لیا جس سے تفتیش کی جا رہی ہے۔
