کانز: فرانس کے شہر کانز میں ہونے والے 72 ویں فیسٹیول میں جن فلموں کا چرچا ہے، ان میں سے ایک فٹ بال کی تاریخ کے عظیم ترین کھلاڑی ڈیگو میراڈونا کی زندگی کے گرد گھومتی ہے.
تفصیلات کے مطابق 72 واں کانز فلم فیسٹیول منگل کو شروع ہوا، جس میں معروف فلمی ہستیوں کے ساتھ نئے اداکار بھی دکھائی دیے. ایک جانب جہاں بڑے بینرز کی فلمیں پیش کی گئیں، وہیں کم بجٹ کی فلموں نے بھی توجہ حاصل کی.
برطانوی خبر رساں ادارے کے مطابق کانز فیسٹول میں پیش کی جانے والی جن فلموں کو خصوصی توجہ دی جارہی ہے، ان میں سے ایک ارجنٹینا کو 86 کا ورلڈ کپ جتوانے والے ڈیگو میراڈونا کی زندگی کے گرد گھومتی ہے.
یہ فلم اتوار کے روز ڈاکومینڑی کانز میں بڑی اسکرین کی زینت بنے گی۔ البتہ یہ پہلے ہی دنیا بھر کے ناقدین سے داد بٹور چکی ہے.
ڈیگو میراڈونا کا شمار دنیا کے مقبول اور متنازع ترین کھلاڑیوں میں ہوتا ہے، ایک جانب جہاں وہ مقبولیت کے عروج پر پہنچے، وہیں انھیں منشیات کے استعمال اور پرتشدد رویوں کی وجہ سے تنقید اور مقدمات کا بھی سامنا کرنا پڑا.
یہ ڈاکومینڑی آصف کپاڈیا کی پیش کش ہے، جنھوں نے سنہ 2016 میں گلوکارہ ایمی وائن ہاؤس پر فلم بنائی تھی، اس فلم کو آسکر کا حق دار قرار دیا گیا تھا. آصف کپاڈیا برازیل کے مشہور فارمولا ون کار ریسر ائرٹن سینا کی زندگی پر بھی فلم بنا چکے ہیں.
