کویت سٹی: کویت نے مملکت میں آنے والے غیر ملکیوں سے متعلق اہم ہدایات جاری کردیں۔
سیکیورٹی ذرائع نے روزنامہ الجریدہ کو بتایا کہ کویت وزارت داخلہ کے ڈائریکٹوریٹ جنرل آف پورٹس نے کریمنل ایویڈینس ڈیپارٹمنٹ اور انفارمیشن سسٹمز کے تعاون سے ہوائی، زمینی اور سمندری سرحدی گزرگاہوں کے ذریعے کویت آنے والے تمام افراد کے فنگر پرنٹ لینے کے فیصلے پر عمل درآمد شروع کردیا ہے۔
کویت وزارت داخلہ کی ہدایت پر عمل کرتے ہوئے کریمنل ایویڈینس ڈیپارٹمنٹ نے تمام سرحدی گزرگاہوں پر خودکار فنگر پرنٹ ڈیوائسز کی تنصیب مکمل کرلی ہے، جبکہ انفارمیشن سسٹم ڈیپارٹمنٹ نے ان آلات کو وزارت داخلہ کے انفارمیشن سسٹم سینٹر سے منسلک کردیا ہے۔
حکام نے واضح کیا کہ تمام مسافروں کو ملک میں پہنچنے پر فنگر پرنٹ کرانے کے مراحل سے لازمی گزرنا ہوگا۔
ادھر روزنامہ القبس کی رپورٹ کے مطابق، زمینی، فضائی اور سمندری بندرگاہوں پر ہفتے کے آخر میں غیر معمولی رش دیکھنے میں آیا جس میں تمام آنے اور جانے والے مسافروں بشمول شہریوں، خلیجی شہریوں اور غیر ملکیوں کے لیے نئے بائیو میٹرک فنگر پرنٹ کے اطلاق کے ساتھ غیر معمولی رش تھا۔
ذرائع نے کہا کہ فنگر پرنٹ ڈیوائس کو جعل سازوں اور قانون کے تحت مطلوب افراد کا پتہ لگانے اور فنگر پرنٹ سے مشروط شخص کے سیکیورٹی ڈیٹا کو ریکارڈ کرنے کے لیے صرف 120 سیکنڈز کی ضرورت ہوتی ہے۔
