سیالکوٹ : معاون خصوصی برائے اطلاعات ڈاکٹر فردوس عاشق اعوان نے کہا ہے کہ سونے کا چمچہ لے کر پیدا ہونے والے بلاول بھٹو نیب کو حساب دیں، مشرف کے ساتھ نیب کے نوٹس کو جوڑنا ٹھیک نہیں۔
ان خیالات کا اظہار انہوں نے سیالکوٹ میں میڈیا سے گفتگو کرتے ہوئے کیا، انہوں نے کہا کہ بلاول بھٹو جیسے دیوانے کی بھڑھکیں لوگ اکثر سُنتے رہتے ہیں۔
معاون خصوصی کا کہنا تھا کہ بلاول بھٹو زرداری کا سابق صدر جنرل (ر) پرویز مشرف کے ساتھ نیب کے نوٹس کو جوڑنا ٹھیک نہیں ہے، بلاول نیب میں جاکر اپنی منی ٹریل بتائیں، سونے کا چمچہ لے کر پیدا ہونے والے پہلے نیب کو حساب دیں۔،
فردوس عاشق اعوان نے کہا کہ مسلم لیگ ن کی نائب صدر مریم نواز کی درخواست کابینہ میں آئی تھی، ان کی درخواست پر قانون کے مطابق فیصلہ ہوگا، ان کو پاکستان سے جانے کی کیا جلدی ہے۔
انہوں نے بتایا کہ منگل کے روزان کے وکلاء کو ثابت کرنا ہوگا کہ سہولت کار کے بغیر بیمار ٹھیک ہو سکتا ہے یا نہیں، منگل کو مریم نواز کی درخواست پر تفصیلی جائزہ لیں گے۔
فردوس عاشق اعوان نے کہا کہ ن لیگ دو بیانیوں میں پھنسی ہوئی ہے اس کے مفادات نظریے میں قید ہے، شہباز شریف اور نوازشریف کے بیانیے الگ الگ ہیں۔
معاون خصوصی کا کہنا تھا کہ پاک فوج نے بھارتی فوج کے ہر محاذ دانت کھٹے کر دیئے ہیں، ہندوستان کے چپے چپے میں مودی کے پَتلے جلائے جارہے ہیں۔
انہوں نے مزید کہا کہ بھارتی پائلٹ ابھی نندن کی واپسی ہندوستان کے منہ پر امن کا طمانچہ ہے، پاکستانی فوج عوام یکجہتی سے مودی کی انتہا پسندی کا مقابلہ کرتے رہیں گے۔
