جدہ : معاون خصوصی فردوس عاشق اعوان نے کہا ہے کہ فیصلہ کرچکے ہیں ملک قرضوں کے سہارے نہیں چلائیں گے، معیشت درست سمت میں گامزن ہے۔

یہ بات انہوں نے جدہ میں میڈیا سے گفتگو کرتے ہوئے کہی، فردوس عاشق اعوان نے کہا کہ سیاحت کے فروغ کیلئے شمالی علاقوں پر حکومت کی خصوصی توجہ ہے، سیاحوں کیلئے شمالی علاقہ جات میں عالمی معیار کے ہوٹلز تعمیر کیے جارہے ہیں، ہمیں مقامی صنعت کو فروغ دینا چاہیے۔

فردوس عاشق اعوان نے کہا کہ ملکی معیشت درست سمت کی جانب گامزن ہے، تاہم مقامی صنعت کو وقتی طور پر چیلنجز کا سامنا ہے، بیمار یونٹس کو وزیراعظم کی ہدایت پر فعال کیا جارہا ہے، حکومت فیصلہ کرچکی ہے کہ اب ملک قرضوں کے سہارے نہیں چلائیں گے۔

ان کا مزید کہنا تھا کہ اوآئی سی کے زیراہتمام ایک الگ ٹی وی چینل ہونا چاہیے، پاک سعودیہ میڈیا تعلقات سے متعلق2020اہم ہوگا، اسلام کے تشخص کو صحیح اندازمیں پیش کرنے کی ضرورت ہے۔

خیال رہے کہ معاون خصوصی فردوس عاشق اعوان (او آئی سی) کے قیام کی گولڈن جوبلی تقریبات میں شرکت کے لیے 2 روزہ دورے پر سعودی عرب میں موجود ہیں، وہ گولڈن جوبلی کی تقریبات میں پاکستان کی نمائندگی کریں گی۔