اسلام آباد: معاون خصوصی برائے اطلاعات و نشریات فردوس عاشق اعوان کا کہنا ہے کہ شرپسندوں کو ایوان میں لانے کا مطالبہ سیاست نہیں ہے، نیب دفتر کے باہر خواتین کو ڈھال بنا کر پولیس کے سامنے کھڑا کیا گیا۔
تفصیلات کے مطابق معاون خصوصی برائے اطلاعات و نشریات فردوس عاشق اعوان نے تقریب سے خطاب کرتے ہوئے کہا کہ وزیر اعظم عمران خان کے دل میں غریب کا احساس ہے، عوام کو ریلیف فراہم کے لیے مزید اقدامات کی ضرورت ہے۔
فردوس عاشق اعوان کا کہنا تھا کہ شرپسندوں کو ایوان میں لانے کا مطالبہ سیاست نہیں ہے، نیب دفتر کے باہر خواتین کو ڈھال بنا کر پولیس کے سامنے کھڑا کیا گیا۔ بہادری کا مظاہرہ کرنا تھا تو اکیلے نیب کے دفتر جاتے۔
انہوں نے کہا کہ بکرے کی ماں کب تک خیر منائے گی۔ بکری کو احتساب کی چھڑی پڑے گی تو مے مے تو نکلے گی، ’ہم سب کو عہد کرنا چاہیئے کہ ہمیں پاکستان کو آگے لے جانا ہے‘۔
اس سے قبل معاون خصوصی نے ایک بیان میں کہا تھا کہ بلاول بدعنوانی اور ناقص کارکردگی چھپانے کے لیے الزامات لگا رہے ہیں، لوٹ مار کا باب بند ہوچکا ہے۔
ان کا کہنا تھا کہ حکومت عوامی فلاح و بہبود کے لیے کوشاں ہے، معیشت کو استحکام کی سمت گامزن دیکھ کر اپوزیشن بوکھلاہٹ کا شکار ہے۔ ہم سابق حکومت کے معیشت کو دیے زخموں پرمرہم رکھ رہے ہیں، معیشت کو گرداب سے نکالنے اور ترقی کی راہ پرگامزن کرنے کے لیے پرعزم ہیں۔
انہوں نے مزید کہا تھا کہ سابق حکمرانوں کی لوٹ مار کی وجہ سے معیشت کا بیڑا غرق ہوا۔
