استحکام پاکستان پارٹی کی ترجمان فردوس عاشق اعوان نے کہا ہے کہ گزشتہ حکومت نے پیٹرول کی قیمت نہ بڑھا کر سیاسی مفاد کیلئے قومی مفاد کو قربان کیا۔
تفصیلات کے مطابق ترجمان استحکام پاکستان پارٹی فردوس عاشق اعوان نے پروگرام باخبرسویرا میں گفتگو کرتے ہوئے کہا کہ پیٹرولیم مصنوعات کی قیمتوں میں اضافےکا ملبہ نگراں حکومت پر نہیں ڈالنا چاہیے، گارڈ آف آنر لے کر جانیوالوں نے کہا ہم نے ملک کو ڈیفالٹ سے بچایا۔
فردوس عاشق کا کہنا تھا کہ شہباز حکومت فیصلے کر کے گئی ہے، معیشت کو وینٹی لیٹر پر رکھا اور ابھی تک معیشت آپریشن تھیٹر سے باہر نہیں آئی، مصنوعی سانسوں پر ہے۔
ترجمان استحکام پاکستان پارٹی نے کہا کہ ذاتی مفاد کے لئے قومی مفاد کو قربان کیا گیا، سارا ملبہ نگراں حکومت پر ڈال دیا، الیکشن کا عمل آئینی و قانونی تقاضا ہے، ہرحال میں ہونے ہیں۔
فردوس عاشق اعوان کا کہنا تھا کہ قومی ایشوز پیچھے رہ گئے ہیں، ہر کوئی اپنی مفاد کی جنگ لڑ رہا ہے، ملک میں مڈل کلاس کا نام و نشان مٹتا جارہا ہے، اشرافیہ کو پٹرول کی قیمت سے کوئی فرق نہیں پڑتا، عوام کےلیے پٹرول کی قیمت ایک امتحان ہے۔
